آسٹریلوی ہائی کمشنر کا پاکستان ویمن کرکٹ ٹیم کیلئے نیک خواہشات کا اظہار
پاکستان میں آسٹریلوی ہائی کمشنر ڈاکٹر جیفری شا نے پاکستان کی ویمن کرکٹ ٹیم کے لیے نیک خواہشات کا اظہار کیا ہے۔
تفصیلات کے مطابق آسٹریلوی ہائی کمشنر ڈاکٹر جیفری شا نے آسٹریلیا میں ہونے والے ساتویں آئی سی سی ویمنزٹی ٹوئنٹی کرکٹ ورلڈ کپ سے قبل منگل کو کراچی میں پاکستانی ویمنز ٹیم سے ملاقات کی۔
اس موقع پر آسٹریلوی ہائی کمشنر کا کہنا تھا کہ پاکستان کی نیشنل ویمنز کرکٹ ٹیم سے ملنا میرے لئے اعزاز کی بات ہے۔
انہوں نے کہا کہ پاکستانی کھلاڑیوں کا آسٹریلیا پہنچنے پر پرتپاک استقبال کیا جائے گا۔میری خواہش ہے کہ ٹیم کا آسٹریلیا میں قیام عمدہ رہے۔
ڈاکٹر جیفری شانے کہا کہ ہمیں یقین ہے کہ ویمنز ٹی ٹوئنٹی ورلڈکپ میں شائقین کو اچھی کرکٹ دیکھنے کو ملے گی۔
آسٹریلوی ہائی کمشنر نے پاکستانی شائقین کو بھی ٹی ٹوئنٹی ورلڈکپ دیکھنے کے لئے آسٹریلیا آنے کی دعوت دی۔
انہوں نے مزید کہا کہ ہم ورلڈ کپ کا فائنل میلبورن کرکٹ گراؤنڈ (ایم سی جی) میں کر رہے ہیں ، جو دنیا کا سب سے بڑا کرکٹ اسٹیڈیم ہے۔ہماری بھرپور کوشش ہے کہ ہم خواتین کے کھیلوں میں سب سے زیادہ تماشائیوں کا ریکارڈ قائم کریں۔
ویمنز ٹی ٹوئنٹی ورلڈ کپ کیلئے قومی اسکواڈ کا اعلان، ثناء میر ڈراپ
ڈاکٹر جیفری شا نے کہا کہ خواتین کے کھیلوں میں سب سے زیادہ تماشائیوں کا موجودہ ریکارڈ نوے ہزار ایک سو پچھتر ( 90175 )ہے جو امریکہ میں فیفا ویمنز ورلڈ کپ 1999ء کے فائنل میں قائم کیاگیا تھا۔
انہوں نے کہا کہ ویمنز ٹی ٹوئنٹی ورلڈ کپ کے دوران ہمارا مقصد اس ریکارڈ کو توڑنا ہے۔
آسٹریلوی ہائی کمشنر نے مزید کہا کہ آسٹریلیا میں خواتین کرکٹ کے لئے اس اعتبار سے یہ میگا ایونٹ ہوگا کہ آسٹریلیا وہ پہلا ملک ہو گا جو انعام کی رقم میں صنفی فرق کو ختم کردے گااور خواتین ٹیم کے لئے انعامی رقم مردوں کی ٹیم کے برابر ہو جائے گی۔
آسٹریلوی ہائی کمشنر سے ملاقات کی تقریب میں ٹی ٹوئنٹی ورلڈ کپ کے لئے منتخب ہونے والی کھلاڑی ، پاکستان قومی خواتین ٹیم کی سلیکشن کمیٹی کی چیئر مین عروج ممتاز ، ٹیم کے کوچز اور پاکستان کرکٹ بورڈ کے سینئر ممبران موجود تھے۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News