چیف سلیکٹر مصباح الحق نے بنگلہ دیش کے خلاف ٹی ٹوئنٹی سیریز کے لیے اسکواڈ کا اعلان کردیا، شعیب ملک اور محمد حفیظ کی واپسی  ہوگئی۔

لاہور میں ٹی ٹوئنٹی  کپتان بابر اعظم کے ہمرا ہ پریس کانفرنس کرتے ہوئے مصباح الحق نے بنگلہ دیش کے خلاف ٹی ٹوئنٹی سیریز کے لیے قومی اسکواڈ کا اعلان کیا۔

تجربہ کار کھلاڑیوں شعیب ملک اور محمد حفیظ کی ٹیم میں واپسی ہوئی ہے، جبکہ سابق کپتان سرفراز احمد ٹیم میں جگہ بنانے میں ناکام رہے ہیں۔

آسٹریلوی بگ بیش لیگ میں کامیابی کے جھنڈے گاڑنے والے ابھرتے ہوئے نوجوان فاسٹ بالر حارث رؤف اور جارح مزاج آل راؤنڈر عماد بٹ کو پہلی مرتبہ ٹیم میں شامل کرلیا گیا  ہے۔

دورہ آسٹریلیا میں ٹیم کا حصہ رہنے والے فخر زمان، امام الحق، حارث سہیل، آصف علی ، محمد عامر، وہاب ریاض اور محمد عرفان کو ڈراپ کردیا گیا ہے۔

اس موقع پر ہیڈ کوچ وچیف سلیکٹر مصباح الحق نے کہا کہ شائقین کرکٹ کو پاکستان میں سیریز کی مبارکباد دیتا ہوں، دو دن کی محنت سے ٹیم بنائی ہے۔

مصباح الحق نے کہا کہ ہم نے آسٹریلیا میں نئے کھلاڑیوں کو موقع دیا، بنگلہ دیش کے خلاف بھی تجربہ کار اور نوجوان کھلاڑیوں پر مشتمل کمبی نیشن بنایا ہے۔

بابر اعظم آئی سی سی کی ون ڈے ٹیم آف دی ایئر میں شامل

چیف سلیکٹر نے کہا کہ ہمیں محمد حفیظ کی ضرورت محسوس ہو رہی تھی، حفیظ اب بھی پاکستان ٹیم کے لیے اچھا پرفارم کر سکتے ہیں۔

مصباح الحق نے کہا کہ شاداب خان پر کام ہو رہا ہے جب کہ عثمان قادر کو بیک اپ کے لیے رکھا گیا ہے۔

قومی ٹیم کے ہیڈ کوچ نے کہا کہ پی ایس ایل کے بعد قومی ٹیم کی نئی شکل نظر آئے گی، جو پرفارم کرے گا وہ ٹیم میں رہے گا۔

مصباح الحق نے کہا کہ ورلڈ کپ تک ہم ایک وننگ کمبی نیشن بنانا چاہتے ہیں، ہر کھلاڑی کی پرفارمنس دیکھ رہے ہیں، کوشش ہے کہ ٹیم کو جیت راہ پر لے کر جائیں۔

اسکواڈ میں شامل کھلاڑیوں کے نام یہ ہیں:

بابر اعظم( کپتان)

احسن علی

عماد بٹ

حارث رؤف

افتخار احمد

عماد وسیم

خوشدل شاہ

محمد حفیظ

محمد حسنین

محمد رضوان

موسیٰ خان

شاداب خان

شاہین شاہ آفریدی

شعیب ملک

عثمان قادر