ڈیوڈ وارنر اور ایرون فنچ نے بھارت پر قہر ڈھا دیا


سید قاسم رضاویب ایڈیٹر

14th January, 2020
بھارت

آسٹریلوی کپتان ایرون فنچ اور ڈیوڈ وارنر  نے بھارتی سورماؤں  پر قہر ڈھا دیا، پہلے ون ڈے میں بھارت کو عبرتناک  شکست  دے دی۔

بھارتی شہر ممبئی کے واکھنڈے اسٹیڈیم میں کھیلے گئے پہلے ایک روزہ میچ میں آسٹریلیا نے ٹاس جیت کر بھارت کو پہلے بیٹنگ کی دعوت دی۔

بھارت کو آغاز میں ہی نقصان اٹھانا پڑا کہ جب 13 کے مجموعی اسکور پر ان  فارم بلے باز روہت شرما  پانچویں اوور میں 10 رنز بناکر مچل اسٹارک کا شکار ہوگئے۔

دوسری وکٹ کے لیے شیکھر دھون اور لوکیش راہول نے ٹیم کو کچھ سنبھالا اور ٹیم کا اسکور 134تک پہنچا دیا۔ لوکیش راہول 47 رنز بنا کر ایشٹن اگر کی گیند پر اسٹیو اسمتھ کو آسان کیچ تھماکر چلتے بنے۔

اگلے ہی اوور میں شیکھر دھون بھی 74 رنز بنا کر پویلین لوٹ گئے۔ اس کے بعد کوئی کپتان ویرات کوہلی  (10)سمیت  کوئی بھی کھلاڑی جم کر نہ کھیل سکا اور یکے بعد  دیگرے وکٹیں گرتی رہیں۔

بنگلہ دیش نے پاکستان آنے کی حامی بھرلی، سیریز کا شیڈول جاری

بھارت کی پوری ٹیم پچاسویں اوور میں 255 رنز بنا کر آل آؤٹ ہوگئی۔

شریاس ایئر4،رشابھ پانت28، رویندرا جدیجا25، ٹھاکر13،محمد شامی 10، کلدیپ یادیو17جبکہ جسپریت بمراہ بغیر کوئی رن بنائے ناٹ آؤٹ رہے۔

آسٹریلیا کی جانب سے مچل اسٹارک نے 3، پیٹ کمنز اور کین رچرڈسن نے 2،2 جبکہ ایڈم زیمپا اور ایشٹن اگر نے ایک ایک وکٹ حاصل کی۔

جواب میں آسٹریلیا نے مقررہ ہدف اوپنرز ڈیوڈ وارنر (128)اور ایرون فنچ (110)کی ناقابل شکست سنچریز کی بدولت با آسانی 38ویں اوور میں بغیر کسی نقصان کے حاصل کرلیا۔

ڈیوڈ وارنر کو میچ کا بہترین کھلاڑی قرار دیا گیا۔

واضح رہے کہ  یہ دوسرا موقع ہے کہ کسی ٹیم نے بھارت کو اس کے ملک میں  ہی دس وکٹوں سے شکست دی ہے۔

یہاں یہ بات بھی قابل ذکر ہے یہ ایک روزہ میچز میں بغیر کوئی وکٹ کھوئے  ہدف حاصل کرنے  میں یہ دوسرا  بڑا ہدف ہے۔