کورونا وائرس کے سبب   بنگلہ دیشی ٹیم  نے دورہ پاکستان  ملتوی کردیا۔

بنگلہ دیشی میڈیا کے مطابق   بنگلہ دیش کرکٹ ٹیم   تین مرحلوں پر مشتمل سیریز کے آخری مرحلے میں کورونا وائرس  کے سبب پاکستان کا دورہ نہیں کرے گی۔

بنگلہ دیشی میڈیا  کا کہنا ہے کہ بنگلہ دیش کرکٹ بورڈ  نے کوروناوائرس کے باعث ٹیم   کو پاکستان نہ بھیجنے کا فیصلہ کیا ہے۔

بنگلہ دیشی ٹیم کو تیسرے مرحلے کےلیے 29 مارچ کو پاکستان پہنچنا تھا جس میں واحد ون ڈے میچ یکم اپریل جبکہ دو میچز پر مشتمل سیریز کا دوسرا ٹیسٹ میچ 5 اپریل سے شیڈول ہے۔

دوسری جانب پاکستان کرکٹ بورڈ کا کہنا ہے کہ  بنگلہ دیش کرکٹ بورڈ نےدورے کے حوالے سے ابھی تک کوئی بات نہیں کی ۔

یاد رہے کہ پہلے مرحلے میں دونوں ٹیموں کے مابین 3 ٹی ٹوئنٹی  میچز پر مشتمل سیریز میں پاکستان نے مہمان ٹیم کو وائٹ واش کیا تھا۔

دوسرے مرحلے دو ٹیسٹ میچز پر مشتمل سیریز کے پہلے میچ میں بھی پاکستان  نے فتح حاصل کی تھی۔نسیم شاہ نے اس میچ میں ٹیسٹ کرکٹ میں ہیٹ ٹرک کرنے والے سب سے کم عمر کھلاڑی ہونے کا اعزاز بھی اپنے نام کیا تھا۔

واضح رہے کہ کورونا وائرس کے سبب پاکستان سپر  لیگ ( پی ایس ایل)  میں شامل کئی غیر ملکی کھلاڑی  بھی لیگ چھوڑ کر جارہے ہیں ۔

پی سی بی ذرائع کا کہنا ہے کہ  انگلینڈ کے کھلاڑیوں نے لیگ سے دستبردار ہونے کے  لیے کہا تھا،کوئی بھی کھلاڑی لیگ سے الگ ہونے کا اختیار رکھتا ہے ۔

ذرائع کا کہنا ہے کہ اگر کوئی لوکل کھلاڑی بھی میچ نہیں کھیلنا چاہتا تو اسے اس کی اجازت ہے۔