فیفاکے صدرگیانی انفین ٹینونے کہا ہے کہ کورونا وائرس سے جنگ جیتنے کے بعد عالمی فٹبال یکسر تبدیل ہوجائے گی۔
تفصیلات کے مطابق فٹبال کی عالمی تنظیم فیفاکے صدرگیانی انفین ٹینو نے کہا ہے کہ کورونا وائرس ایک بھیانک خواب ہے،جو پوری دنیا پر مسلط ہے۔
انفین ٹینو نے کہا کہ دنیا اجتماعی کاوشوں سے جلد اس وباء سے باہرنکل جائے گی تاہم کورونا سے جنگ جیتنے کے بعد عالمی فٹبال یکسر تبدیل ہو جائے گی۔
فیفا کے صدر نے کہا کہ ہم جب اس ڈراؤنے خواب سے باہرآئیں گے توفٹبال زیادہ بہتر، دلچسپ، سوشل اور انفرادی ممالک میں باہمی ہم آہنگی کو فروغ دینے والی اور اختلافات سے مبرا ہوگی۔
ان کا مزید کہنا تھا کہ اس مہلک وائرس نے ہمیں انسانی درد کا احساس دلایا ہے جس کے بعد ہم سب زیادہ بہتر رویے اور انسانی قدروں کا احساس کرنے والے ہوں گے۔
انفین ٹینو نے کہا کہ فٹبال کے میدانوں میں بھی اسپورٹس مین شپ اور رنگ، نسل اور زبان کی ہم آہنگی فروغ پائے گی۔
فٹبال چیف نے فٹبال میں انقلابی تبدیلیوں کی ضرورت پر زور دیتے ہوئے کہا کہ ہمیں فٹبال کو چند طاقتور کلبوں کے ہاتھوں سے نکال کر زیادہ عوامی زیادہ دلچسپ اور سنسنی خیز بنانا ہو گا۔
انہوں نے کہا کہ ایسا کرنے کے لیے ٹورنامنٹس کی تعداد کم لیکن زیادہ مقابلے سے بھرپور میچزکرانے ہوں گے ۔کم لیکن متوازن اسکواڈز، محدود مگر زیادہ دلچسپ میچز سے فٹبال کی بین الاقوامی مقبولیت میں اضافہ ہوگا۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News