آسٹریلیا نے تین ایک روزہ میچز کی  سیریز کے تیسرے اور آخری میچ میں انگلینڈ کو انتہائی سنسنی خیز مقابلے کے بعد 3وکٹوں سے شکست دے کر سیریز 1-2 سے اپنے نام کر لی۔

تفصیلات کے مطابق مانچسٹر میں کھیلے گئے سیریز کے آخری ایک روزہ میچ میں انگلینڈ نے ٹاس جیت کر پہلے بیٹنگ کا فیصلہ کیا  جو تباہ کن ثابت ہوا اور میچ کی ابتدائی دو گیندوں پر  ہی جیسن روئے اور جو روٹ پویلین لوٹ گئے۔

ابتدائی مشکلات کے باوجود جونی بیئر اسٹو  کے 112 رنز ، سیم بلنگز  کے 57 رنز اور کرس ووکس کے ناقابل شکست 53  رنز کی بدولت  انگلینڈ نے مقررہ 50 اوورز میں 7 وکٹ کے نقصان پر 302 رنز بنالیے ۔

آسٹریلیا کی جانب سے مچل اسٹارک اور ایڈم زیمپا نے 3، 3 جبکہ پیٹ کمنز نے ایک وکٹ حاصل کی۔

303 رنز کے ہدف کے تعاقب میں ابتدائی 5 وکٹیں 73  رنز پر گنوانے کے بعد کسی کو یہ گمان نہیں تھا کہ آسٹریلیا  میچ جیت سکتا ہے تاہم گلین میکسویل اور ایلکس کیری نے چھٹی وکٹ کے لیے212 رنز کی پارٹنرشپ کرکےناممکن کو  ممکن کردکھایا۔

میکسویل نے 108  جبکہ کیری نے 106 رنز بنائے۔

آسٹریلیا نے مقررہ ہدف 7 وکٹوں کے نقصان پر 2 گیندوں قبل حاصل کرلیا۔

انگلینڈ  کی جانب سے کرس ووکس اور جو روٹ نے 2،2 جبکہ جوفرا آرچر اور عادل رشید نے ایک ایک وکٹ حاصل کی۔

میچ اور سیریز کے بہترین  کھلاڑی کے ایوارڈز  گلین میکسویل کے نام رہے۔