قومی کرکٹ ٹیم کے ہیڈ کوچ و چیف سلیکٹر مصباح الحق کا کہنا ہے کہ  کسی کی ناراضگی کی وجہ سے نہیں ، اپنی مرضی سے استعفیٰ دیا ہے۔

لاہور میں پریس کانفرنس کرتے  ہوئے  قومی کرکٹ ٹیم کے ہیڈ کوچ و چیف سلیکٹر  مصباح الحق نے چیف سلیکٹر کے عہدے سے استعفیٰ دینے کا اعلان کیا۔

مصباح الحق  نے کہا کہ یہ غلط افوا ہ ہے کہ وزیر اعظم سے ملاقات پر چیئرمین پی سی بی کی ناراضگی کی وجہ سے استعفیٰ دیا۔چیف سلیکٹر کا عہدہ چھوڑنے کا مقصد مستقبل کو دیکھ کرکیا ہے۔

انہوں نے کہا کہ   زیادہ تر سیریز ملک سے باہر کھیلنی ہیں اور  ملک سے باہر رہ کر قومی ٹیم کے ساتھ کام کرنا اور سلیکٹر کا عہدہ سنبھالنا مشکل تھا۔ بورڈ سے بات کی اور ایک عہدہ چھوڑنے کا فیصلہ کیا ہے۔

ہیڈ کوچ نے کہا کہ  مستقبل کو ذہن میں رکھتے ہوئے فیصلہ کیا ہے کہ یہی صحیح وقت ہے۔کرکٹ بورڈ کا شکریہ کے انہوں نے اس کو قبول کیا۔

مصباح الحق نے کہا کہ میری اپنی چوائس ہے کہ ایک عہدے کے ساتھ ٹیم پر فوکس کرنا ہے۔جتنا عرصہ کام کیا اپنے بہتر فیصلے ٹیم کی بہتری کے لیے کیے۔

انہوں نے مزید کہا کہ مطمئن ہوں کہ جتنی دیر بھی رہا بہتر کام کیا۔مستقبل میں بھی امید ہے جو وژن ہے اسی وژن والا کوئی بندہ آگے آئے گا۔  ہر فارمیٹ میں پاکستان کو ٹاپ تھری میں لانا ہے۔