نیشنل ٹرائنگولر ٹی ٹوئنٹی ویمنز کرکٹ چیمپئن شپ پی سی بی چیلنجرز نے جیت لی


زاہد فاروق ملک رپورٹر

01st December, 2020
Square ad 300 x 250

پی سی بی چیلنجرزنے نیشنل ٹرائنگولر ٹی ٹوئنٹی ویمنز کرکٹ چیمپئن شپ کا فائنل جیت لیا۔

تفصیلات کے مطابق  ‏ پنڈی کرکٹ اسٹیڈیم راولپنڈی میں کھیلی جانے والی نیشنل  ٹرائنگولر ویمنز کرکٹ  چیمپئن شپ پی سی بی چیلنجرز نے جیت لی ۔

پی سی بی چیلنجرز نے فائنل میں پی سی بی ڈائنا مائٹس کو 7 رنز سے شکست دی ۔

پی سی بی ڈائنا مائٹس نے   ٹاس  جیت کر  پی سی بی چیلنجرز  کو  پہلے کھیلنے کی دعوت دی ۔

پی سی بی چیلنجرز نے مقررہ 20 اوورز میں 7 وکٹوں کے نقصان پر 133 رنز بنائے ۔ صدف شمس  اور منیبہ علی نے پہلی وکٹ کی شراکت میں 15 رنز جوڑے ۔ کپتان منیبہ علی 9 رنز بنا کر  آؤٹ ہوئیں ۔ صدف شمس نے 18 رنز بنائے ۔

کائنات حفیظ نے 27 گیندوں پر 31 رنز تین چوکوں اور ایک چھکے کی مدد سے بنائے ۔ بسمہ معروف 12 گیندوں پر 18 رنز بنا کر آؤٹ ہوئیں ۔ وحیدہ  اختر 11 اور فاطمہ ثناء 24 رنز بنا کر  ناٹ آؤٹ رہیں ۔

‏ پی سی بی ڈائنا مائٹس  کی جانب سے سبحا نہ طارق نے چار اوورز  میں 37 رنز دے کر تین کھلاڑیوں کو پویلین بھیجا ۔ نشرہ سندھو اور رامین شمیم نے ایک  ایک وکٹ حاصل کی ۔

‏ہدف کے تعاقب میں پی سی بی ڈائنا مائٹس مقرر 20 اوورز میں 6 وکٹوں کے نقصان پر 126 رنز بنا سکی ۔

ناہیدہ خان  نے 39، عائشہ ظفر نے  ایک ، حفصہ خالد نے 20 ، عمیمہ سہیل نے 12 اور ارم جاوید نے 15 رنز بنائے ۔ کائنات امتیاز 29 گیندوں پر دو چوکوں کی مدد سے 32 رنز بنا کر ناٹ آؤٹ رہیں ۔

پی سی بی چیلنجرز کی جانب سے سیدہ عروب شاہ نے دو جبکہ ایمن انور ، فاطمہ ثناء ، اور ندا ڈارنے ایک ایک وکٹ حاصل کی۔

کائنات حفیظ پلیئر آف دی میچ قرار پائیں۔

کائنات امتیاز کو آل راونڈ پرفارمنس پر پلئیر آف دی ٹورنامنٹ قرار دیا گیا ۔انہوں نےٹورنامنٹ میں 111 رنز بنائے اور تین وکٹیں حاصل کیں۔