قومی کرکٹ ٹیم کے ہیڈ کوچ مصباح الحق کا کہنا ہے کہ راولپنڈی ٹیسٹ کے لیے ٹیم میں تبدیلی کا فیصلہ پچ دیکھ کرکریں گے۔
تفصیلات کے مطابق راولپنڈی کرکٹ اسٹیڈیم میں پہلے پریکٹس سیشن کے بعد ہیڈکوچ مصباح الحق کا پریس کانفرنس کرتے ہوئے کہنا تھا کہ کراچی ٹیسٹ میں ٹیم نے مشکل صورتحال سے فائٹ کیا۔
مصباح الحق نے کہا کہ راولپنڈی میں کنڈیشنز تھوڑی تبدیل ہوں گی، کوشش یہی ہوگی کہ جو غلطیاں ہوئیں ان کو نہ دوہرائیں۔ جنوبی افریقہ ایک بہترین ٹیم ہے اور فائٹ بیک کر سکتی ہے۔
انہوں نے کہا کہ راولپنڈی ٹیسٹ کی فائنل الیون کا انتخاب آخری دن کریں گے، پچ کو دیکھتے ہوئے اگر ضرورت پڑی تو ٹیم میں تبدیلی کریں گے۔ کوشش یہی ہوگی کہ راولپنڈی ٹیسٹ جیت کر سیریز جیتیں۔
ہیڈ کوچ نے کہا کہ فرسٹ کلاس میں راولپنڈی کی پچ کافی گرین ہوتی ہے تاہم ابھی جو پچ بن رہی اسے دھوپ لگ رہی ہے۔ ٹیسٹ میچ سے ایک دن قبل تک لگ رہا ہے کہ پچ کافی ڈرائی ہو جائے گی۔
مصباح الحق نےمزید کہا کہ تبریز شمسی رسٹ اسپنر ہیں اور ڈرائی کنڈیشن میں رسٹ اسپنر کافی خطرناک ہوتا ہے۔کراچی ٹیسٹ میں اسپن کو پاکستان نے اچھا کھیلا اور راولپنڈی ٹیسٹ کے لیے بھی یہی کوشش ہوگی۔
انہوں نے کہا کہ نیوزی لینڈ سیریز میں ہارنے کے بعد جو باتیں چل رہی تھیں مجھے اس سے کوئی غرض نہیں، میری پوری توجہ راولپنڈی ٹیسٹ میچ پر مرکوزہے۔
ہیڈ کوچ کا کہنا تھا کہ حارث رؤف بہت اچھی بولنگ کر رہے ہیں اورٹرینننگ کے دوران چودہ چودہ اوورز کر رہے ہیں۔ وہ اپنی بولنگ میں بہتری لا رہے ہیں اور مزید بہتر ہو رہے ہیں۔
مصباح الحق نے کہا کہ حسن علی کو ایک میچ میں جج کرنا زیادتی ہے کیونکہ حسن کم بیک کر رہے ہیں اور ڈومیسٹک میں اچھا پرفارم کرکے آئے ہیں۔
انہوں نے مزید کہا کہ شاہین شاہ پر ہرگز لوڈ نہیں ڈال رہے ،فزیوتھراپسٹ ان کے ورک لوڈ کو دیکھ رہے ہیں۔ ایسی کوئی بات نہیں کہ شاہین شاہ پر ورک لوڈ زیادہ پڑ رہا ہے اور اسے ہم زبردستی کھلا رہے ہیں۔
ہیڈ کوچ کا کہنا تھا کہ محمد حفیظ کی جیسی فارم لگی ہوئی ہے ان کا ٹیم میں نہ ہونا فرق ضرور ڈالے گا۔ محمد حفیظ کو یاد کریں گے لیکن یہ کسی اور کے لیے بھی ایک موقع ہے۔ ہماری کوشش ہے کہ ہر کھلاڑی کو مکمل موقع دیا جائے تاکہ کھلاڑی ٹیم میں جگہ بنا سکے۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News