قومی ٹیسٹ ٹیم کے اوپنر عابد علی کا کہنا ہے کہ بنگلا دیش کے خلاف ٹیسٹ میں اچھی بیٹنگ کی وجہ ڈومیسٹک سیزن ہے۔

چٹاگانگ میں بنگلا دیش کے خلاف تیسٹ میچ میں کامیابی کے بعد ممیڈیا سے بات کرتے ہوئے عابد علی نے کہا کہ بنگلا دیش کے خلاف ٹیسٹ سیریز کا پہلا میچ ہم نے جیت لیا اب ہماری نظر دوسرے ٹیسٹ پر ہے، آئی سی سی مینز ورلڈ ٹیسٹ چیمپئین شپ ہمارے لیے بڑی اہم ہے، ہماری کوشش ہے کہ ٹیسٹ چیمپئین شپ کے پوائنٹس ٹیبل میں اوپر کی طرف بڑھتے جائیں۔

عابد علی نے کہا کہ پہلے ٹیسٹ میں مین آف دی میچ بننے کی بہت خوشی ہے، مین آف دی میچ بننے کا کریڈٹ ڈومیسٹک میں کھیلنے کو جاتا ہے، ڈومیسٹک کرکٹ کھیلنے سے مجھے اعتماد ملا ہے، پہلی اننگز میں سنچری مکمل کی ، دوسری میں نہ کر سکا لیکن یہ کھیل کا حصہ ہے۔ بنگلا دیش کے خلاف پہلے ٹیسٹ کی دونوں اننگز میں اچھی بیٹنگ اب ماضی کا حصہ بن گئی، کوشش ہوگی یہ یہ تسلسل دوسرے ٹیسٹ میں بھی برقرار رکھوں، دوسرا ٹیسٹ ڈھاکا میں ہوگا، اس میں بھی اسی طرح مثبت ذہن کے ساتھ میدان میں اتریں گے۔

چٹاگانگ ٹیسٹ میں ساتھی اوپنر عبداللہ شفیق کی کاکردگی پر عابد علی نے کہا کہ عبداللہ شفیق اپنے اولین ٹیسٹ میں بہت اعتماد کے ساتھ کھیلے ہیں، ہم دونوں کا پلان یہی تھا کہ وکٹ پر ٹھہرنا ہے، بیٹنگ کے دوران ایک دوسرے کی غلطیاں بتاتے رہے۔

واضح رہے کہ پاکستان نے بنگلا دیش کو ٹیسٹ سیریز کے پہلے میچ میں 8 وکٹوں سے شکست دی ہے۔