ڈھاکہ: پاکستان کے خلاف پہلی اننگ میں بنگلادیش کی ٹیم مشکلات کا شکار ہوگئی ہیں جبکہ بنگلادیش کے صرف 22 رنز پر 3 کھلاڑی آؤٹ ہوگئے ہیں۔

پاکستان اور بنگلادیش کے درمیان ٹیسٹ سیریز جاری ہے جس کا دوسرا میچ ڈھاکہ کے شیر بنگلا کرکٹ اسٹیڈیم میں کھیلا جارہا ہے جبکہ آج چوتھے دن کے کھیل کے موقع پر بنگلا دیش کی ٹیم مشکلات کا شکار ہوگئی ہے۔

بنگلادیش کے اننگ کے آغاز میں ہی صرف 22 رنز پر 3 کھلاڑی آؤٹ ہوگئے ہیں، آؤٹ ہونے والے کھلاڑیوں میں شادمان اسلام، محمود الحسن اور مومن الحق شامل ہیں جبکہ 278 رنز کا ٹریل اب بھی باقی ہے۔

یہ بھی پڑھیں: ڈھاکہ ٹیسٹ کے چوتھے دن کا کھیل جاری، میچ بے نتیجہ رہنے کا قومی امکان

چوتھے دن کے کھیل کا آغاز بھی بوندا بادی کے باعث تاخیر کا شکار رہا اور گراؤنڈ اسٹاف نے اسٹیڈیم کی پچ اور اسکوائر کو ڈھانپ رکھا تھا تاہم بعد ازاں پاکستان نے دوبارہ اپنی اننگ کا آغاز کیا۔

پاکستان کی جانب سے اننگ کا آغاز قومی ٹیم کے کپتان بابر اعظم اور اظہر علی نے کیا جبکہ بابر اعظم 76 رنز اسکور کرکے پویلین لوٹ گئے ہیں اور ان کے پیچھے ہی اظہر علی بھی 56 رنز بناکر آؤٹ ہوگئے۔

پاکستان ٹیم نے اپنی پہلی اننگ 4 وکٹوں کے نقصان پر 300 رنز بناکر ڈکلیئر کردی ہے جبکہ فواد عالم 50 رنز بناکر اور محمد رضوان 53 رنز بناکر ناٹ آؤٹ رہے ہیں۔

واضح رہے کہ پاکستان اور بنگلادیش کے درمیان دو ٹیسٹ میچز پر مشتمل سیریز کھیلی جارہی ہے جس میں پاکستان کو ایک صفر کی برتری حاصل ہے، سیریز میں شامل دونوں میچز آئی سی سی ورلڈ ٹیسٹ چیمپئن شپ کا حصہ ہیں۔