انڈین کرکٹ ٹیم کے سابق کپتان ویرات کوہلی نے ٹیسٹ ٹیم کی کپتانی چھوڑنے کا فیصلہ ایک دن قبل کر لیا تھا اور ساتھی کھلاڑیوں کو آگاہ بھی کر دیا تھا۔

ویرات کوہلی چار مہینے کے اندر ہی بھارت کی ٹی20، ون ڈے اور ٹیسٹ تینوں فارمیٹ کی کپتانی سے ہٹ گئے ہیں۔

انہوں نے ستمبر میں ہی ٹی20 ٹیم کی کپتانی چھوڑ دی تھی اور دسمبر میں ان سے ون ڈے کی کپتانی چھین لی گئی اور کیپ ٹاون ٹسٹ ہارتے ہی انہوں نے ٹیسٹ ٹیم کی کپتانی چھوڑنے کا فیصلہ سنایا۔

ویرات نے ٹوئٹ کرکے مداحوں کو اپنے فیصلے سے آگاہ کیا۔ حالانکہ ایسی خبریں آرہی ہیں کہ ویرات نے ٹوئٹ سے ایک دن قبل ہی ڈریسنگ روم میں ساتھی کھلاڑیوں کو اپنے اس فیصلے سے آگاہ کر دیا تھا۔

 جنوبی افریقہ کے خلاف جمعہ کو کیپ ٹاون ٹیسٹ میچ کے ساتھ ہندوستان نے سیریز بھی گنوا دی۔ اس کے بعد ویرات کوہلی نے ڈریسنگ روم میں ٹیم میٹنگ کی۔ اسی میٹنگ میں ہی انہوں نے پوری ٹیم کو ٹیسٹ کرکٹ کی کپتانی چھوڑنے سے آگاہ کیا۔

بھارت کے ایک انگریزی جریدے کی ایک رپورٹ کے مطابق، کیپ ٹاون ٹسٹ میں شکست کے بعد ویرات کوہلی نے ٹیم میٹنگ میں اپنے اس فیصلے کی اطلاع دی۔ انہوں نے ساتھیوں سے کہا کہ وہ ٹسٹ کپتانی چھوڑنے جا رہے ہیں۔ ہر کوئی ان کے اس فیصلے کو سن کر حیران رہ گیا۔

 ڈریسنگ روم میں ہوئی میٹنگ میں موجود ہندوستانی ٹیم کے کھلاڑیوں کے حوالے سے رپورٹ میں بتایا گیا ہے کہ کوہلی نے اس دوران سبھی سے ایک گزارش بھی کی۔

 اخباری رپورٹ کے مطابق، ویرات کوہلی نے کہا، ’میں ایک چھوٹا فیور مانگ رہا ہوں۔ پلیز ڈریسنگ روم سے باہر کسی کے ساتھ میری کپتانی چھوڑنے کی خبر شیئر نہ کریں‘۔

https://twitter.com/imVkohli/status/1482340422987169794?ref_src=twsrc%5Etfw%7Ctwcamp%5Etweetembed%7Ctwterm%5E1482340422987169794%7Ctwgr%5E%7Ctwcon%5Es1_&ref_url=https%3A%2F%2Findianexpress.com%2Farticle%2Fsports%2Fcricket%2F24-hours-before-tweeting-kohli-had-informed-team-that-he-was-stepping-down-7724992%2F

اس میٹنگ کے 24 گھنٹے بعد ہفتہ کی شام کو وراٹ کوہلی نے سوشل میڈیا کے ذریعہ دنیا اور بی سی سی آئی کو اپنے اس فیصلے سے آگاہ کیا۔

 انہوں نے ایک لمبا چوڑا پوسٹ شیئر کرکے لکھا، ’ٹیم کو صحیح سمت میں لے جانے کے لئے 7 سال سے ہر دن سخت محنت کی۔ میں نے اس کام کو پوری ایمانداری سے نبھایا ہے اور اس میں کچھ بھی باقی نہیں چھوڑا ہے۔ کسی نہ کسی سطح پر ہر چیز کا خاتمہ ہوتا ہے اور میرے لئے ہندوستان کے ٹسٹ کپتان کے طور پر یہ اب ہے‘۔

اس سے قبل انہوں نے ستمبر میں ٹی20 کی کپتانی چھوڑنے کا فیصلہ کیا تھا۔ اس کے بعد جنوبی افریقہ دورے سے عین قبل سلیکٹروں نے ان سے ون ڈے کی کپتانی چھین لی تھی۔