قومی ٹیم کے فاسٹ باؤلر محمد حسنین کا بولنگ ایکشن غیر قانونی قرار دے دیا گیا ہے۔

کرکٹ آسٹریلیا نے قومی کرکٹ ٹیم کے فاسٹ باؤلر محمد حسنین کے بولنگ ایکشن کی ٹیسٹ رپورٹ  کا اعلان کردیا ہے جس کے مطابق محمد حسنین کے بولنگ ایکشن کو غیر قانونی قرار دیا گیا ہے۔

کرکٹ آسٹریلیا کا کہنا ہے کہ محمد حسنین کو غیر قانونی بولنگ ایکشن کی وجہ سی معطل کردیا گیا ہے جبکہ محمد حسنین انٹر نیشنل کرکٹ میں بولنگ ایکشن کی درستگی تک معطل رہیں گے۔

دوسری جانب محمد حسنین کے حوالے سے پی سی بی نے اعلامیہ جاری کیا ہے جس میں ترجمان پی سی بی کا کہنا تھا کہ محمد حسنین کا باؤلنگ ایکشن ٹیسٹ 21  فروری  کو لاہور میں کیا گیا۔

ان کا کہنا تھا کہ کرکٹ آسٹریلیا کے ماہرین نے محمد حسنین کے باؤلنگ ایکشن کو غیر قانونی قرار دیا ہے جبکہ کرکٹ آسٹریلیا سے تفصیلی رپورٹ آج موصول ہوئی ہے۔

ترجمان پی سی بی نے کہا کہ گڈ لینتھ ، فل لینتھ ، باؤنسر اور سلو باؤنسر ڈیلیوریز کرتے ہوئے محمد حسنین کے بازو کا خم 15 ڈگری سے بڑھ جاتا ہے۔

ترجمان پی سی بی کا کہنا تھا کہ یقین ہے کہ محمد حسنین کے ایکشن کا مسئلہ حل ہو سکتا ہے جبکہ پی سی بی ایک بولنگ کنسلٹنٹ کا تقرر کرے گا جو محمد حسنین کے ساتھ ان کے باؤلنگ ایکشن پر کام کرے گا۔

ترجمان پی سی بی کے مطابق پی ایس ایل 7 کی ٹیکنیکل کمیٹی کی سفارش پر محمد حسنین کو لیگ میں مزید شرکت کی اجازت نہیں ہے۔

ترجمان پی سی بی کا کہنا ہے کہ غیر قانونی بولنگ ایکشن کی درستگی تک محمد حسنین بین الاقوامی کرکٹ میں بھی باؤلنگ سے معطل رہیں گے۔