لاہور: آسٹریلیا کے خلاف ہوم سیریزکے لیے محمد یوسف کو قومی ٹیم کا بیٹنگ کوچ مقرر کیا گیا ہے۔

ذرائع کے مطابق رمیز راجہ نے پی سی بی افسران کے ساتھ مشاورت مکمل کرلی ہے جس کے بعد نیشنل ہائی پرفارمنس سینٹر کا ہیڈ کوچ رچرڈ پائی بس کو لگائے جانے کا امکان ہے۔

رچرڈ پائی بس پاکستان ٹیم کی کوچنگ کرچکے ہیں، جنوبی افریقی کرکٹر لانس کلوزنر کو پاور ہٹنگ کوچ لگائے جانے کا امکان ہے جبکہ بیٹنگ کوچ کے لئے محمد یوسف کو مقرر کیا گیا ہے۔

قومی ٹیم کے ہیڈ کوچ کے لیے ثقلین مشتاق کو رمیز راجہ فائنل کرچکے ہیں، مشتاق احمد مزید 12 ماہ کے لیے قومی کرکٹ ٹیم کے ہیڈ کوچ رہیں گے۔

علاوہ ازیں شان ٹیٹ کو 12 ماہ کے لیے قومی کرکٹ ٹیم کا فاسٹ باؤلنگ کوچ مقر کیا گیا ہے۔

دوسری جانب دورہ پاکستان کے لیے آسٹریلیا نے 18 رکنی ٹیسٹ اسکواڈ کا اعلان کردیا ہے، ٹیم کی قیادت پیٹ کمنز کے سپرد کی گئی ہے جبکہ اسٹیو اسمتھ نائب کپتان ہوں گے۔

آسٹریلین اسکواڈ میں آشٹن اگر، اسکاٹ بولینڈ ایلیکس کیری، کیمرون گرین ٹیم میں شامل ہیں جبکہ مارکوس ہیرس، جوش ہیزل ووڈ، ٹریوس ہیڈ اور جوش انگلس کو شامل کیا گیا ہے۔

عثمان خواجہ، مارنوس لبوشین، نیتھن لیوئن اور میچل مارش بھی ٹیم میں شامل ہیں جبکہ مائیکل نیصر، مچل اسٹارک، مچل سویپسن اور ڈیوڈ وارنر کو بھی ٹیم کا حصہ بنایا گیا ہے۔

واضح رہے کہ آسٹریلیا کی ٹیم 24 برس بعد پاکستان کا دورہ کر رہی ہے جبکہ اس دورے میں 3 ٹیسٹ، 3 ون ڈے میچز پر مشتمل سیریز کھیلی جائے گی جبکہ 1 ٹی ٹوئنٹی میچ بھی دورے میں شیڈول ہے۔