آسٹریلوی کرکٹ اسٹار شین وارن کی موت کے بعد ان کے اہل خانہ نے دل دل سوز بیان جاری کردیا۔

شین وارن کی موت پر ان کے والدین نے کہا کہ 4 مارچ 2022 کی رات ہمارے خاندان کے لیے ایک نہ ختم ہونے والا ڈراؤنا خواب شروع ہوا، اس دن ہم نے اپنے بہت پیارے بیٹے، ایک باپ، ایک بھائی اور ایک چچا شین کیتھ وارن کو کھو دیا،  یہ ایک ایسا المیہ جسے ہم کبھی نہیں بھولیں گے۔

انہوں نے مزید کہا کہ اپنے دکھ کے اظہار کے لیے الفاظ تلاش کرنا ایک ناممکن کام ہے اور شین کے بغیر مستقبل کی طرف دیکھنا ناقابل فہم ہے۔امید ہے کہ ہمارے پاس شین کی خوشگوار یادوں کا پہاڑ غم سے نمٹنے میں ہماری مدد کرے گا۔

یہ بھی پڑھیں: ’بال آف دی سینچری‘ کرنے والے شین وارن کے کیریئر پر ایک نظر

شین وارن کی سب سے بڑی بیٹی بروک اور بیٹے جیکسن نے اپنے والد کو  بہترین باپ کے طور پر خراج تحسین پیش کیا۔

بروک نے کہا کہ مجھ میں اور والد میں کافی چیزیں مشترک تھیں جس کی بناء  پر میں ان سے اکثر کہا کرتی تھیں کہ مجھ میں آپ کی عادتیں  مل گئی ہیں۔

انہوں نے مزید کہا کہ میں اپنے والد سے بہت پیار کرتی ہوں اور ہمیشہ ان کی کمی محسوس کروں گی۔

بیٹے جیکسن نے کہا کہ اب گولف کورس میں گھومنا اور پیزا کھانا  کبھی پہلے جیسا نہیں ہوگا لیکن میں جانتا ہوں کہ وہ مجھے ہر حال میں خوش رکھنا چاہتے تھے، وہ چاہتے تھے کہ بس میں خوش رہوں۔

یہ بھی پڑھیں: شین وارن کی موت طبعی تھی، تھائی پولیس

جیکسن نے مزید کہا کہ میں یہی کرنے جا رہا ہوں، کوشش کرو اور خوش رہو۔ میں ان کی کمی ہمیشہ محسوس کروں گا، آپ واقعی بہترین والد اور دوست تھے۔

یاد رہے کہ آسٹریلیا کے لیجنڈری لیگ اسپنر شین وارن 4 مارچ کو 52 برس کی عمر میں انتقال کرگئے تھے۔

شین وارن کی موت  دل کا دورہ پڑنے سے  ہوئی تھی جب وہ تھائی لینڈ کے کوہ ساموئی میں اپنے ولا میں بے جان پائے گئے تھے اور  طبی عملے کی بہترین کوششوں کے باوجود وہ جانبر نہ ہوسکے تھے۔