راولپنڈی: پشاور میں جمعے کے روز ہونے والے خودکش حملے کے بعد راولپنڈی میں سیکیورٹی کے انتظامات سخت کردیے گئے ہیں۔

آسٹریلیا اور پاکستان کے درمیان پنڈی کرکٹ اسٹیڈیم میں کھیلے جانے والے پہلے ٹیسٹ میچ کے لیے اسٹیڈیم کے آس پاس کے تمام شاپنگ مالز اور مارکیٹس پہلے ہی بند ہیں۔

مقامی حکومت نے اسٹیڈیم روڈ پر ہر قسم کی کار پارکنگ پر پابندی لگا دی ہے اور اسے راول روڈ پارک میں منتقل کر دیا ہے۔

 سیکیورٹی خدشات کے پیش نظر انتظامیہ نے فیملیز کو راول روڈ پارک اور علامہ اقبال پارک میں مستقل طور پر جانے سے بھی منع کیا ہے۔

یہ بھی پڑھیں: پنڈی ٹیسٹ کا دوسرا روز؛ پاکستان کی آسٹریلیا کے خلاف بیٹنگ جاری

ذرائع کے مطابق مقامی انتظامیہ نے راولپنڈی کرکٹ اسٹیڈیم کے قریب رینجرز اور آرمی افسران کی تعیناتی کا مطالبہ کیا ہے۔

راولپنڈی ڈویژن کے کمشنر، ڈپٹی کمشنر (ڈی سی) اور سٹی پولیس آفیسر (سی پی او) نے سیکیورٹی انتظامات کا معائنہ کرنے کے لیے اسٹیڈیم روڈ کا دورہ کیا۔

یاد رہے کہ پاکستان آسٹریلیا میچ کے دوران 450 سے زائد پولیس اہلکار ڈیوٹی پر موجود ہیں جبکہ سونگھنے والے کتے بھی ممکنہ طور پر خطرناک مواد کے لیے اسٹیڈیم روڈ کے ہر کونے کی جانچ کر رہے ہیں۔

یہ بھی پڑھیں: سانحہ مسجد کوچہ رسالدار کا مقدمہ درج، 2 مبینہ ملزم گرفتار

پولیس کی جانب سے اسٹیڈیم روڈ کے اطراف کے علاقے سے ہر قسم کے دکان کو بند کروادیا گیا ہے جبکہ میچ کے دوران مقامی انتظامیہ نے میٹرو بس انتظامیہ سے شمس آباد اسٹیشن پر بسوں کو نہ روکنے کو کہا ہے۔

اس حوالے سے آسٹریلیا کے کوچ اینڈریو میکڈونلڈ کا کہنا ہے کہ ‘ ٹیم محفوظ ہاتھوں میں ہے، تاہم اگر حالات تبدیل ہوتے ہیں تو ہماری سکیورٹی ٹیم ہماری  رہنمائی کرے گی’۔

واضح رہے کہ 24 سالوں میں آسٹریلیا کے پاکستان کے پہلے دورے کی کامیابی ممکنہ طور پر اعلی ٹیموں کے باقاعدہ دورے کا باعث بن سکتی ہے جنہوں نے 2009 میں لاہور میں سری لنکا کی ٹیم کی بس پر حملے کے بعد سے جنوبی ایشیائی ملک کو بڑی حد تک چھوڑ دیا تھا۔