پاکستان سپر لیگ (پی ایس ایل) کی فرنچائز لاہور قلندرز نے دو سال بعد پلیئرز ڈویلپمنٹ پروگرام (پی ڈی پی) کو دوبارہ شروع کرنے کا اعلان کیا ہے۔

پی ایس ایل سیزن 7 کی فاتح لاہور قلندرز 17 مئی کو لاہور میں ایک جدید ترین ہائی پرفارمنس سینٹر میں اوپن ٹرائلز کا انعقاد کرنے جارہی ہے جس کی نگرانی غیر ملکی کوچ کریں گے۔

اوپن ٹرائلز میں سابق انگلش فاسٹ بولر اور یارکشائر کے مینجنگ ڈائریکٹر ڈیرن گف بھی یارکشائر کے اسسٹنٹ کوچ کبیر علی کے ساتھ موجود ہوں گے۔

منتخب کھلاڑیوں کو قلندرز کی جانب سے ہائی پرفارمنس سینٹر میں تربیت دی جائے گی جس کے لیے انہیں ایک سال کی اسکالرشپ بھی ملے گی۔

واضح رہے کہ لاہور قلندرز کا پلیئر ڈویلپمنٹ پروگرام ایک عالمی سطح پر مشہور کرکٹ ڈویلپمنٹ پروگرام ہے جس نے کئی ایسے کرکٹرز پیدا کیے ہیں جو اب مختلف ٹیموں کے لیے ملکی اور بین الاقوامی سطح پر خدمات انجام دے رہے ہیں۔

اس پروگرام نے ملک کے کروڑوں خواہشمند کرکٹرز کو اپنے خوابوں تک پہنچنے کے لیے امید فراہم کی ہے جس کی تازہ مثال حارث رؤف ہیں۔

لاہور قلندرز کے سی ای او عاطف رانا کا کہنا ہے کہ وہ اس پروگرام کو دوبارہ شروع کرنے کے لیے بے حد پرجوش ہیں جس نے پاکستان کو حارث رؤف جیسے ستارے مہیا کیے ہیں۔

ان کا کہنا تھا کہ کورونا کی پابندیوں کی وجہ سے ہم پچھلے دو سالوں میں اس پروگرام کو کرنے سے قاصر رہے لیکن اب جیسے جیسے حالات میں بہتری آئی ہے تو ہم سمجھتے ہیں کہ وقت آگیا ہے کہ اس پروگرام کو دوبارہ شروع کریں اور ملک کی خدمت کے لیے مزید باصلاحیت کھلاڑی تلاش کریں۔

اس موقع پر لاہور قلندرز کے ہیڈ کوچ عاقب جاوید نے کہا کہ وہ پر امید ہیں کہ مزید باصلاحیت کھلاڑیوں کو منظرعام پر آتے ہوئے دیکھیں گے۔

انہوں نے کہا کہ پلیئرز ڈویلپمنٹ پروگرام صرف ایک ٹیلنٹ ہنٹ پروجیکٹ نہیں ہے بلکہ یہ ایک مکمل ترقیاتی پروگرام ہے جو نہ صرف ٹیلنٹ کو چنتا ہے بلکہ اس ٹیلنٹ کو ایک پرفارمر میں بھی بدل دیتا ہے۔

ان کا مزید کہنا تھا کہ آپ نے حارث رؤف کی مثال تو دیکھی ہے جو پہلی بار جب یہاں آیا تو ایک نامعلوم شخص تھا لیکن آج اس کا شمار وائٹ بال کرکٹ میں ٹاپ پرفارمرز میں ہوتا ہے۔