قومی ٹیم کے چیف سلیکٹر محمد وسیم نے آل راؤنڈر عماد وسیم کو اسکواڈ سے ڈراپ کرنے کی وجہ فٹنس مسائل قرار دے دیا ہے۔

پاکستان کرکٹ ٹیم کے چیف سلیکٹر محمد وسیم کا کہنا ہے کہ عماد وسیم فٹنس مسائل کا شکار ہیں جس سے ان کی پرفارمنس پر بھی فرق پڑرہا ہے۔

چیف سلیکٹر کا کہنا تھا کہ اسکواڈ میں شامل دیگر کھلاڑیوں کی فٹنس کا معیار بہت زیادہ ہے اور اس ہہی وجہ ہے کہ محمد نواز کو عماد وسیم کی جگہ اسکواڈ میں شامل کیا گیا ہے۔

انہوں نے کہا کہ محمد نواز کی فٹنس اور کارکردگی اچھی جارہی ہے جس کی وجہ سے وہ ٹیم کے لیے بہترین آپشن تھے، عماد جلد اپنے فٹنس مسائل پرقابو پاکر اسکواڈ میں واپس آنے کی صلاحیت رکھتے ہیں۔

واضح رہے کہ ویسٹ انڈیز کے خلاف ہوم سیریز کے لیے 16 رکنی اسکواڈ کا اعلان کیا گیا ہے جس کا تربیتی کیمپ یکم جون سے لاہور میں لگے گا۔

اس حوالے سے کھلاڑیوں کو کیمپ جوائن کرنے کی ہدایت کردی گئی ہیں جبکہ اسکواڈ میں شامل انگلش کاؤنٹی میں مصروف کھلاڑی بھی یکم جون سے ہی کیمپ کو جوائن کریں گے۔

پاکستانی اسکواڈ

پاکستانی اسکواڈ میں تین اوپنرز، تین مڈل آرڈر بیٹرز، دو وکٹ کیپرز، تین اسپنرز اور پانچ فاسٹ بولرز کو شامل کیا گیا ہے جس کی کپتانی بابر اعظم اور نائب کپتانی شاداب خان کے سپرد کی گئی ہے۔

دیگر اسکواڈ میں فخر زمان، عبداللہ شفیق، حارث رؤف، حسن علی، افتخار احمد، خوشدل شاہ، امام الحق شامل ہیں جبکہ محمد حارث کو محمد رضوان کے ساتھ بطور وکٹ کیپر شامل کیا گیا ہے۔

محمد نواز، محمد وسیم جونیئر، شاہنواز دہانی، زاہد محمود اور شاہین شاہ آفریدی کو بھی اسکواڈ کا حصہ بنایا گیا ہے۔

حیدر علی، آصف علی، آصف آفریدی اور عثمان قادر کو ویسٹ انڈیز کے خلاف اسکواڈ کا حصہ نہیں بنایا گیا ہے جبکہ سعود شکیل سائنوسائٹس سرجری کے باعث سلیکشن میں شامل نہیں تھے۔