پاکستان اور سری لنکا کے درمیان ہونے والی ٹیسٹ سیریز کے شیڈول کا اعلان کردیا گیا ہے۔

پاکستان کرکٹ ٹیم کے دورہ سری لنکا کا اعلان ہوگیا ہے جس دوران قومی ٹیم دو ٹیسٹ میچز کی سیریز کھیلے گی۔

دونوں ٹیموں کے درمیان پہلا ٹیسٹ میچ 16 جولائی سے گال میں شروع ہوگا جبکہ دوسرا ٹیسٹ میچ 24 جولائی سے کولمبو میں کھیلا جائے گا۔

واضح رہے کہ پاکستان اور سری لنکا کے درمیان وینیوز کو لے کر طویل مشاورت جاری تھی جس کے باعث شیڈول کے اعلان میں تاخیر کا امکان تھا تاہم اب باقاعدہ شیڈول کا اعلان کردیا گیا ہے۔

دورہ سری لنکا کے لیے قومی اسکواڈ کا اعلان بھی کردیا گیا ہے جس میں یاسر شاہ کی واپسی ہوئی ہے جبکہ بابر اعظم کو کپتان اور محمد رضوان کو نائب کپتان رکھا گیا ہے۔

علاوہ ازیں اسکواڈ میں عبداللہ شفیق، اظہر علی، فہیم اشرف، فواد عالم، حارث رؤف، حسن علی، امام الحق، محمد نواز، نسیم شاہ، نعمان علی، سلمان علی آغا، سرفراز احمد (وکٹ کیپر)، سعود شکیل، شاہین شاہ آفریدی اور شان مسعود کو شامل کیا گیا ہے۔

ٹیسٹ اسکواڈ 25 جون کو راولپنڈی میں رپورٹ کرے گا اور 26 جون سے ٹریننگ کیمپ کا باقاعدہ آغاز کیا جائے گا۔

چیف سلیکٹر محمد وسیم کا کہنا ہے کہ سری لنکا کی کنڈیشنز کو پیش نظر رکھتے ہوئے قومی ٹیسٹ اسکواڈ کا انتخاب کیا گیا ہے۔

یہ بھی پڑھیں: توقع ہے کہ سیریز بحران زدہ سری لنکا میں خوشی لائے گی، ایرون فنچ

یاسر شاہ کی شمولیت سے ہمارا اسپن اٹیک مضبوط ہوا ہے، جنہوں نے پاکستان کے آخری دورہ سری لنکا میں بھی میچ ونر کا کردار ادا کیا تھا۔ انہیں ساجد خان کی جگہ اسکواڈ میں شامل کیا گیا ہے۔

انہوں نے کہا کہ نعمان علی پہلے ہی قومی ٹیسٹ اسکواڈ کا حصہ رہے ہیں۔ اسکواڈ میں شامل ہونے والے دوسرے کھلاڑی سلمان علی آغا گذشتہ تین سیزنز سے مستقل قابل ذکر کارکردگی کا مظاہرہ کررہے ہیں، وہ ایک مؤثر آف اسپنر بھی ہیں۔

محمد وسیم نے مزید کہا کہ گو کہ آسٹریلیا کے خلاف سیریز کے نتائج آئیڈیل نہیں تھے تاہم بنگلہ دیش کے خلاف کامیابی حاصل کرنے والی ٹیم نے مہمان ٹیم کے خلاف بھی بہتر کرکٹ کھیلی تھی جس کی وجہ سے انہوں نے اسکواڈ میں زیادہ تبدیلیاں نہیں کی ہیں۔