بھارت اور ویسٹ انڈیز کی ٹیموں کے درمیان پہلے ٹی ٹوئنٹی میچ میں بھارت کی جیت کے بعد فکسنگ کے شبہات پیدا ہوگئے ہیں۔

بھارت اور ویسٹ انڈیز کی ٹیموں کے درمیان 5 ٹی ٹوئنٹی میچز پر مشتمل سیریز ویسٹ انڈیز میں جاری ہے جس کا پہلا میچ برائن لارا اسٹیڈیم ٹرینیڈاڈ میں کھیلا گیا۔

اس میچ میں بھارت نے ویسٹ انڈیز کو روہت شرما اور دنیش کارتھک کی عمدہ بیٹنگ کی بدولت 68 رنز سے شکست دی تاہم میچ کے بعد فکسنگ کے شبہات پیدا ہوگئے ہیں۔

میچ کے دوران ایک ایسا واقعہ پیش آیا جسے دیکھ کر سب حیران رہ گئے کیونکہ پہلی اننگز میں دنیش کارتھک کو ویسٹ انڈیز کے بولر اوبیڈ میک کوئے نے رن آؤٹ ہی نہیں کیا۔

ہوا کچھ یوں کہ میچ کے 18 ویں اوور میں دنیش کارتھک ایک رن مکمل کرنے کے بعد دوسرے رن کے لیے دوڑے تو گیند پہلے ہی نان اسٹرائیک پر پہنچ گئی۔

نان اسٹرائیک اینڈ پر موجود بولر اوبیڈ میک کوئے گیند کو ہاتھوں میں تھام کر ایشون کے پہنچنے کا انتظار کرتے رہے اور اس دوران انہوں نے بیلز نہیں گرائیں۔

یہ منظر دیکھ کر کرکٹ ماہرین اور شائقین حیران رہ گئے جبکہ خود ایشون نے بھی رن آؤٹ نہ ہونے پر حیرانی کا اظہار کیا۔

واضح رہے کہ ویسٹ انڈیز کے بولر اوبیڈ میک کوئے آئی پی ایل میں ایشون کے ساتھ راجھستان رائلز کی نمائندگی کرتے ہیں جبکہ اس واقعہ کی ویڈیو بھی سوشل میڈیا پر وائرل ہورہی ہے۔

ویڈیو دیکھنے کے بعد صارفین نے بھی حیرت کا اظہار کیا اور بولر کی غائب دماغی قرار دیا جبکہ کئی افراد نے اس حرکت پر اپنا شبہ ظاہر کیا ہے۔

صارفین خاص طور پر آئی پی ایل میں دونوں کھلاڑیوں کے ساتھی ہونے کا حوالہ دے رہے ہیں جبکہ اس واقعے میں میچ فکسنگ کی بھی بو آنے لگی ہے۔