زمبابوے کرکٹ ٹیم کے آل راؤنڈر سکندر رضا کا کہنا ہے کہ رکی پونٹنگ کی تعریف نے میرے اعتماد میں اضافہ کردیا تھا۔

پاکستان میں پیدا ہونے والے سکندر رضا پاک فضائیہ میں شامل ہونے کے خواہشمند تھے لیکن وہ ٹیسٹ میں ناکام ہوگئے جس کے بعد ان کی فیملی زمبابوے منتقل ہوگئی۔

سکندر رضا نے اسکاٹ لینڈ میں اپنی گریجویٹ کی تعلیم جاری رکھی جب کہ 2013 میں زمبابوے کی ٹیم میں منتخب ہونے سے قبل وہ ڈومیسٹک کرکٹ کھیلا کرتے تھے۔

سکندر رضا کے مطابق کھیل کو بڑی مشکل سے سکھنا پڑتا ہے، میں نے کرکٹ کا انتخاب بہت دیرسے کیا اور شاید میں نے اپنا کافی وقت بھی ضائع کردیا۔

انہوں نے کہا کہ زمبابوے میں زیادہ تر لوگ جاب کو ترجیح دیتے ہیں جب کہ ہمیں بڑے ممالک سے کھیلنے کی ضرروت نہیں ہے۔

پرتھ اسٹیڈیم میں یہ سکندر رضا کا پہلا میچ تھا جس میں انہوں نے پاکستان کے خلاف شاندار کارکردگی کا مظاہرہ کرتے ہوئے 25 رنز دے کر 3 وکٹیں حاصل کیں اور یوں وہ اس میچ میں ایک ہیرو کے طور پر ابھر کر سامنے آئے۔

واضح رہے کہ اس میچ میں زمبابوے نے سنسنی خیز مقابلے کے بعد ایک رنز سے کامیابی اپنے نام کی تھی۔

سکندر رضا کا میڈیا سے گفتگو کرتے ہوئے کہنا تھا کہ رکی پونٹنگ کی تعریف نے انہیں بڑے پلیٹ فارم پر اچھی کارکردگی کا مظاہرہ کرنے میں کافی مدد کی۔

یاد رہے کہ آئی سی سی کی ایک حالیہ ویڈیو میں رکی پونٹنگ نے زمبابوے ٹیم کی تعریف کرتے ہوئے سکندر رضا کو بہترین کھلاڑی قرار دیا تھا۔

رکی پونٹنگ کا کہنا تھا کہ 36 سال کا ہونے کے باوجود وہ زیادہ جوانی کے جوش کے ساتھ کھیلتے ہوئے نظر آتے ہیں، انہیں دیکھ کر ایسا لگتا ہے کہ وہ دوبارہ 26 کے ہوگئے ہیں۔

سکندر رضا کے مطابق رکی پونٹنگ کے اس بیان نے ان کے اعتماد میں نمایاں اضافہ کیا تھا۔

انہوں نے کہا کہ جب میں صبح اٹھا تو میرے دوست نے مجھے ایک پیغام بھیجا اور کہا کہ ’کیا آپ نے آئی سی سی پر کوئی کلپ دیکھا ہے؟‘ جو کہ رکی پونٹنگ کا زمبابوے اور میرے متعلق بیان تھا۔

سکندر رضا نے بتایا کہ رکی پونٹنگ کا بیان سن کر میرے دوستوں اور خاندان والوں کی آنکھوں میں آنسو آگئے تھے جس پر میری ہنسی چھوٹ گئی۔

انہوں نے مزید کہا کہ ’ایسا نہیں کہ مجھے ایک اضافی کک کی ضرروت تھی لیکن اگر ضرورت تھی بھی تو وہ اس کلپ نے پوری کردی‘۔