قومی فاسٹ بولر نسیم شاہ کی طبیعت کے حوالے سے حوصلہ افزاء خبر سامنے آئی ہے جب کہ محمد حسنین مکمل آرام کریں گے۔

پاکستان کے دو فاسٹ بولر نسیم شاہ اور محمد حسنین میں وائرل انفیکشن کی تشخیص ہوئی تھی جس کے بعد وہ نیوزی لینڈ میں جاری سہ فریقی سیریز کے دونوں میچز نہیں کھیل سکے ہیں۔

اطلاعات کے مطابق نسیم شاہ کی طبیعت میں بہتری آئی ہے جب کہ محمد حسنین مکمل آرام کریں گے۔

نسیم شاہ نے آج اور کل نیٹ سیشن میں کووڈ سیفٹی پروٹول کے تحت کسی دوسرے کھلاڑی کی شرکت کے بغیر حصہ لیا ہے جب کہ وہ حال ہی میں کورونا وائرس سے بھی صحت یاب ہوچکے ہیں۔

دوسری جانب قومی ٹیم نے نیوزی لینڈ کے خلاف میچ سے قبل آج ایک دن کی چھٹی لی جب کہ پیر سے پریکٹس سیشن شیڈول ہے اور منگل کو قومی ٹیم نیوزی لینڈ کے مدمقال ہوگی۔

واضح رہے کہ سہ فریقی سیریز میں پاکستان نے لگاتار دو میچز میں کامیابی حاصل کی ہے، انہوں نے سیریز کے پہلے میچ بنگلادیش کو 21 رنز سے شکست دی جب کہ نیوزی لینڈ کو 6 وکٹوں سے ہرایا۔

نیوزی لینڈ اور بنگلادیش کی ٹیموں کے درمیان آج ہونے والے میچ میں نیوزی لینڈ نے باآسانی 8 وکٹوں سے کامیابی حاصل کی ہے۔