قطر میں  ہونے والے فیفا ورلڈکپ  میں گلیمرس لباس پہننا خواتین شائقین کو مہنگا پڑ سکتا ہے۔

تفصیلات کے مطابق  فیفا ورلڈکپ 2022 کا آغاز چند روز بعد قطر میں ہو جائے گا جس میں 32 ٹیمیں مد مقابل آئیں گی۔

یہ پہلا موقع ہے جب فیفا ورلڈکپ کسی خلیجی ریاست میں منعقد ہورہا ہے۔

قطر کے سخت قوانین کے باعث 35 ڈگری سینٹی گریڈ درجہ حرارت میں بھی یورپی اور دیگر ٹھنڈے ممالک سے تعلق رکھنے والی غیر مسلم خواتین شائقین کو بھی لباس کے چناؤ میں بہت احتیاط برتنی ہوگی۔

قطر کے قانونی ضابطے کے مطابق عوامی مقامات پر محبت کا اظہار کرنا یا جسم کی نمود و نمائش والے لباس پہننا گرفتاری کا  باعث بن سکتا ہے۔

غیر ملکی خواتین پرستاروں کو  خاص طور پر اس بات کا خیال رکھنا ہوگا کہ وہ قانون کے تحت جسم کے کتنے حصے کو نمایاں کر سکتی ہیں۔

قانون کے تحت قطری خواتین کے لیے عبایا کی شرط غیر قطری خواتین  پر لاگو نہیں  ہوتیں تاہم انہیں ایسے لباس زیب تن کرنے ہوں گے جن سے کندھے اور پیٹ نظر نہ آئے جبکہ اسکرٹس یا کسی بھی لباس کی لمبائی گھٹنوں سے نیچے تک ہونی چاہیئے۔

اسی طرح مردوں کو  بھی شرٹ اتارنے  یا سلیو لیس شرٹ پہننے پر جرمانے اور جیل کا سامنا کرنا پڑسکتا ہے۔

ٹورنامنٹ کے دوران کوڑا کرکٹ پھینکنے پر  بھی شائقین کو 2400 یورو تک جرمانے کا سامنا کرنا پڑ سکتا ہے۔

واضح رہے کہ فیفا ورلڈکپ  کا آغاز 20 نومبر کو قطر اور ایکواڈور کے درمیان میچ سے ہوگا۔