انگلینڈ کے سابق ٹیسٹ کپتان جوئے روٹ نے پاکستان ٹیم کو خطرناک قرار دیتے ہوئے کہا ہے کہ پاکستان میں شاندار کھلاڑی موجود ہیں۔
سابق انگلش کپتان کا بیان ایسے وقت میں سامنے آیا ہے کہ جب پاکستان اور انگلینڈ کی ٹیموں کے درمیان اتوار کو میلبرن کرکٹ گراؤنڈ میں ٹی ٹوئنٹی ورلڈ کپ کا فائنل میچ ہونے جارہا ہے۔
غیر ملکی اسپورٹس چینل سے بات کرتے ہوئے جوئے روٹ کا کہنا تھا کہ ’پاکستان ٹیم میں شاندار بولرز اور بیٹرز کے ساتھ کچھ شاندار میچ ونر بھی موجود ہیں‘۔
یہ بھی پڑھیں: نروس نہیں ہیں، لیکن فائنل کا پریشر ہوتا ہے، بابر اعظم
جوئے روٹ کا بابر اعظم اور محمد رضوان سے متعلق گفتگو کرتے ہوئے کہنا تھا کہ دونوں کھلاڑی اس فارمیٹ میں ایک طویل مدت سے مستقل مزاجی سے کھیلتے آرہے ہیں۔
انہوں نے کہا پاکستان ایک خطرناک ٹیم ہے جس کے پاس شاندار کھلاڑی موجود ہیں جب کہ انگلینڈ کو فائنل کے لیے اپنی ٹیم کو بالکل ٹھیک بنانا ہوگا۔
سابق انگلش کپتان نے کہا کہ انگلینڈ نے سیمی فائنل میں ناقابل یقین کارکردگی کا مظاہرہ کرتے ہوئے صحیح وقت پر عروج حاصل کیا ہے جو کہ انگلینڈ کی اب تک کی سب سے بہترین کارکردگی رہی ہے۔
انہوں نے مزید کہا کہ جوز بٹلر اور ایلکس ہیلز کی بھارت کے خلاف تباہ کن کارکردگی رہی ہے جب کہ ایک ٹیم کے طور پر سیمی فائنل جیسے پریشر والے میچ میں اس سے اچھی کارکردگی اور کیا ہوگی۔
واضح رہے کہ پاکستان نے پہلے سیمی فائنل میں نیوزی لینڈ کو 7 وکٹوں سے شکست دے کر فائنل کے لیے کوالیفائی کیا ہے جب کہ دوسرے سیمی فائنل میں انگلینڈ بھارت کو 10 وکٹوں سے شکست دے کر فائنل میں پہنچا ہے۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News