راولپنڈی: پاکستان اور انگلینڈ کے درمیان ہونے والے پہلے ٹیسٹ میچ کے لیے ٹریفک پولیس نے پارکنگ و ٹریفک پلان جاری کردیا ہے۔

پاکستان اور انگلینڈ کے درمیان کل سے راولپنڈی میں پہلا ٹیسٹ میچ شروع ہونے جارہا ہے جس کے حوالے سے ٹریفک پولیس نے شائقین کرکٹ اور شہریوں کے لئے پارکنگ ڈائیورشن پلان جاری کیا ہے۔

ٹریفک پولیس کا اپنے بیان میں کہنا ہے کہ کرکٹ میچ کے دوران ٹریفک پولیس کے 432 اہلکارڈیوٹی کے فرائض سر انجام دیں گے، شائقین کرکٹ کے لئے 2 جگہوں کو پارکنگ کے لئے مختص کیا گیا ہے۔

ٹریفک پولیس کے مطابق پہلی پارکنگ سول ایوی ایشن گراﺅنڈ جب کہ دوسری پارکنگ گورنمنٹ ڈگری کالج فار بوائز ففتھ روڈ پر ہوگی، شائقین کرکٹ کو پارکنگ اسٹینڈ سے کرکٹ اسٹیڈیم تک شٹل سروس کی سہولت مہیا کی جائے گی۔

یہ بھی پڑھیں: انگلش کھلاڑی بیمار، پنڈی ٹیسٹ ہوگا یا نہیں؟

انہوں نے کہا کہ کرکٹ ٹیموں کی روانگی اور واپسی کے وقت مری روڈ کو فیض آباد سے ڈبل روڈ تک مکمل طور پر بند کیا جائے گا جب کہ اس دوران اسلام آباد سے آنے والی ٹریفک کو فیض آباد سے ایکسپریس وے کی جانب موڑا جائے گا۔

ان کا کہنا تھا کہ راولپنڈی سے اسلام آباد جانے والی ٹریفک کو سید پور روڈ کی طرف ڈائیورٹ کیا جائے گا، دوران میچ اسٹیڈیم روڈ کو نائنتھ ایونیو چوک سے ڈبل روڈ تک دونوں اطراف سے مکمل طور پر بند رکھا جائے گا۔

اسلام آباد نائنتھ ایونیو سے آنے والی ٹریفک کو فیض آباد ایکسپریس وے اور آئی جے پی روڈ کی طرف موڑا جائے گا، راولپنڈی سے ڈبل روڈ نائنتھ ایونیو اسلام آباد جانے والی گاڑیاں فیض آباد سے اسلام آباد میں داخل ہوسکیں گیں۔

ٹریفک پولیس کے مطابق شائقین کرکٹ و شہریوں کی سہولت کے لئے پارکنگ و متبادل راستوں کے متعلق شاہراہوں پر آگاہی بینرز بھی آویزاں کیے گئے ہیں۔

ان کا مزید کہنا تھا کہ ٹریفک پولیس کے آفیشل سوشل میڈیا پیجز اور ریڈیو اسٹیشن 88.6 پر ٹریفک صورت حال کے متعلق لمحہ با لمحہ آگاہی فراہم کی جائے گی۔