ٹی ٹوئنٹی ورلڈ کپ کے فائنل میں پاکستان کو انگلینڈ کے ہاتھوں 5 وکٹوں سے شکست کا سامنا کرنا پڑا تھا۔

قومی ٹیم نے ٹی ٹوئنٹی ورلڈ کپ کے فائنل میں انگلینڈ کو جیت کے لیے 138 رنز کا ہدف دیا جس کے بعد یہ خیال کیا جارہا تھا کہ انگلینڈ کے لیے مقررہ ہدف حاصل کرنا آسان ہوگا۔

اس کی بڑی وجہ سیمی فائنل میں ان کی جارحانہ بلے بازی تھی جس کی بدولت انگلینڈ نے بھارت کو 16 اوورز میں 170 رنز کا ہدف حاصل کرکے شکست دی تھی۔

اس کے برعکس انگلینڈ کا پاکستان کے خلاف ایک ایک رنز حاصل کرنا مشکل ہوگیا تھا جس کی وجہ پاکستان کا بولنگ اٹیک تھا جب کہ قومی بولرز نے غیر معمولی کارکردگی کا مظاہرہ کیا تھا۔

ٹی ٹوئنٹی ورلڈ کپ کے فائنل میں پاکستان کے فاسٹ بولرز شاہین آفریدی، حارث رؤف اور نسیم شاہ کی عمدہ بولنگ کو ہمیشہ یاد رکھا جائے گا۔

قومی ٹیم کے فاسٹ بولر حارث رؤف کی ٹی ٹوئنٹی ورلڈ کپ فائنل کے تجربے کے بارے میں ایک ویڈیو پی سی بی کی جانب سے شیئر کی گئی ہے۔

.@HarisRauf14 reflects on Pakistan's T20 World Cup journey, gelling as a team and the fans' support.#T20WorldCup pic.twitter.com/sdgfdPa27d

— Pakistan Cricket (@TheRealPCB) November 13, 2022

اس ویڈیو میں ان کا کہنا تھا کہ ہم مختلف حالات میں کھیلے اور ہمارے سفر میں اتار چڑھاؤں آتے رہے لیکن ہم نے اس ورلڈ کپ سے بہت کچھ سیکھا ہے۔

انہوں نے کہا کہ ہمیں امید تھی کہ ہم سیمی فائنل میں جگہ بنالیں گے اور نیدرلینڈز کے خلاف میچ کے بعد ہم نے ٹورنامنٹ میں واپسی کی، جس طرح سے ہم نیوزی لینڈ کے خلاف اس نے ہمیں بہت زیادہ اعتماد دیا لیکن بدقسمتی سے ہم فائنل میں ہار گئے۔

حارث رؤف کہتے ہیں ٹورنامنٹ میں اتار چڑھاؤ کے باوجود ٹیم ایک ساتھ رہی، ہم سب ایک دوسرے کا ساتھ دیتے ہیں۔

فاسٹ بولر نے کہا کہ بابر اعظم ہمیں بہت زیادہ اعتماد دیتے ہیں، میں پاکستانی شائقین اور آسٹریلیا میں موجود شائقین کا شکر گزار ہوں جنہوں نے ہمیں سپورٹ کیا اور فائنل کا لطف اٹھایا۔

یہ بھی پڑھیں: حارث رؤف اپنی کامیابی کا کریڈٹ کس کو دیتے ہیں؟

واضح رہے کہ پاکستان اب یکم دسمبر سے ہوم گراؤنڈ پر انگلینڈ کے خلاف تین میچز کی ٹیسٹ سیریز کھیلے گا۔

شاہین آفریدی کو انجری کے سبب سیریز میں آرام دیا جائے گا جب کہ ان کی جگہ ٹیسٹ اسکواڈ میں حارث رؤف کے ڈیبیو کرنے کا امکان ہے۔