فیفا ورلڈ کپ کے فائنل میں ارجنٹائن نے سنسنی خیز مقابلے کے بعد فرانس کو شکست دے دی ہے۔

قطر میں جاری فیفا ورلڈ کپ اختتام پزیر ہوگیا ہے جس میں لیونل میسی کی ٹیم ارجنٹائن نے فتح اپنے نام کی ہے جب کہ ام باپے کی ٹیم فرانس رنر اپ رہی ہے۔

میڈیا رپورٹس کے مطابق فیفا ورلڈ کپ کی فاتح ٹیم کو 4 کروڑ 20 لاکھ ڈالرز دیے جائیں گے جب کہ رنر اپ ٹیم فرانس کو 3 کروڑ ڈالرز دیے جائیں گے۔

یہ بھی پڑھیں: فرانس کو شکست دیکر ارجنٹینا تیسری بار عالمی چیمپئن بن گیا

اسی طرح تیسرے نمبر کی ٹیم کروشیا کو 2 کروڑ 70 لاکھ ڈالرز ملیں گے جب کہ چوتھے نمبر کی ٹیم مراکش کو 2 کروڑ 50 لاکھ ڈالرز کی ایک بڑی انعامی رقم ملے گی۔

رپورٹس کے مطابق کوارٹر فائنل کھیلنے والی ہر ٹیم کو 1 کروڑ 70 لاکھ ڈالرز دیے جائیں گے جب کہ راؤنڈ آف 16 کھیلنے والی ٹیموں کو 1 کروڑ 30 لاکھ ڈالرز ملیں گے۔

ورلڈ کپ کھیلنے والی ہر ٹیم کو 90 لاکھ ڈالرز ملیں گے جب کہ ٹورنامنٹ کی تیاریوں کے اخراجات کی مد میں ہر ٹیم کو 15 لاکھ ڈالر علیحدہ سے دیے جائیں گے۔

واضح رہے کہ فیفا ورلڈ کپ 2018 جیتنے والی فرانس ٹیم کی فٹ بال فیڈریشن کو فیفا کے 40 کروڑ ڈالر کے انعامی فنڈ میں سے تین کروڑ 80 لاکھ ڈالر ملے تھے۔

یاد رہے کہ فیڈریشن کو ملنے والی ساری انعامی رقم کھلاڑیوں میں تقسیم نہیں ہوتی بلکہ انہیں اس کا ایک اچھا حصہ ملنے کی امید ہوتی ہے۔