انگلش بولر جیک لیچ نے دوسرے ٹیسٹ میں ملتان کی پچ پر بولنگ کرواکر خوشی کا اظہار کیا ہے۔

انگلش بولر جیک لیچ نے آج ملتان ٹیسٹ کے دوسرے دن کے کھیل کے اختتام پر پریس کانفرنس کی جس میں انہوں نے ملتان کی پچ پر بولنگ کرواکر خوشی کا اظہار کیا۔

          انگلش بولر کہتے ہیں ٹیسٹ میچ کا دوسرا دن ہمارے لیے اچھا رہا جب کہ بین ڈکٹ کے بعد ہیری بروک نے اچھی بیٹنگ کی۔

انہوں نے کہا کہ ملتان کی پچ بیٹنگ کے لیے اتنی آسان نہیں ہے جب کہ پنڈی کے مقابلے میں پچ مختلف تھی۔

ان کا کہنا تھا کہ میں نے اس پچ پر بولنگ کرکے انجوائے کیا، ایسی پچز پر بولنگ چیلنج ہوتا ہے لیکن آپ کو تھوڑا صبر کرنا پڑتا ہے۔

انگلش بولر کا کہنا تھا کہ مجھے امید ہے کہ تیسرے روز بھی اسی طرح کھیلیں گے، ہمارا آج کا آغاز اچھا تھا جس کا ہمیں فائدہ ہوا جب کہ ہمیں وقفے وقفے سے وکٹیں ملتی رہیں۔

انہوں نے مزید کہا کہ ہم جیتنے کے لیے کھیلتے ہیں جس کے لیے کچھ بھی کرنا پڑے ہم کرنے کی کوشش کرتے ہیں اور یہی ہمارا پلان ہوتا ہے، ہماری کوشش ہوگی جتنے ہو سکیں رنز بنائیں شاید پانچ سو رنز۔

واضح رہے کہ پاکستان اور انگلینڈ کے درمیان ملتان میں دوسرا ٹیسٹ جاری ہے جس کی پہلی اننگز میں انگلینڈ نے 281 رنز اسکور کیے جب کہ پاکستان کی ٹیم اپنی پہلی اننگز میں 202 رنز پر ہی ڈھیر ہوگئی۔

دوسری اننگز کا آغاز انگلینڈ نے 79 رنز کی برتری سے کیا اور دن کے اختتام تک 5 وکٹوں کے نقصان پر 202 رنز بنالیے جب کہ انگلینڈ کو مجموعی طور پر 281 رنز کی برتری حاصل ہے۔