مغربی آسٹریلوی کرکٹ کی سربراہ کرسٹینا میتھیوز نے کرکٹ آسٹریلیا سے اپیل کی ہے کہ ویسٹ انڈیز کے مسلسل دوسرے سال کے بجائے پاکستان کے خلاف پرتھ کو تاریخی ٹیسٹ میچ کی میزبانی کا موقع فراہم کیا جائے۔

پاکستان اور آسٹریلیا کے درمیان تین ٹیسٹ میچز پر مشتمل سیریز جو دسمبر اور جنوری میں کھیلے جانے والی، سیریز کا پہلا میچ میلبرن کرکٹ گراؤنڈ، دوسرا سڈنی جب کہ تیسرا ایڈیلیڈ میں کھیلے جانے کا امکان ہے۔

پاکستان نے اوپٹس اسٹیڈیم میں کبھی بھی ٹیسٹ میچ نہیں کھیلا ہے جب کہ پاکستان کا پچھلا دورہ صرف ٹی ٹوئنٹی میچز تک ہی محدود تھا جس میں زمبابوے کے خلاف ٹی ٹوئنٹی ورلڈ کپ کا اپ سیٹ میچ بھی شامل ہے۔

مغربی آسٹریلوی کرکٹ کی سربراہ کرسٹینا میتھیوز پرتھ اسکارچرز کی بڑی فولوونگ کو مزید بین الاقوامی کرکٹ شائقین میں تبدیل کرنے کی امید رکھتی ہیں جب کہ انہوں نے کرکٹ آسٹریلیا سے مغربی آسٹریلیا میں ٹیسٹ میچز کی خواہش ظاہر کی ہے۔

کرسٹینا میتھیوز نے مقامی خبر رساں ادارے کو بتایا کہ ’ہم نے یقینی طور بتادیا ہے کہ ہماری ترجیح پاکستان ہے۔ ہماری ترجیح ویسٹ انڈیز نہیں ہے کیونکہ آپ ایک ہی ٹیم کو لگاتار دوسرے سال بھی نہیں دیکھ سکتے، چاہے آپ کچھ بھی کررہے ہوں‘۔

انہوں نے کہا کہ ہمارے پاس پاکستان کافی عرصے سے کھیلنے نہیں آیا لہذا اوپٹس اسٹیڈیم ان کی میزبانی کرنے کے قابل ہے جس میں وہ پہلے بھی ٹی ٹوئنٹی میچز کھیل چکے ہیں لیکن آج تک ٹیسٹ میچ نہیں کھیلا۔

ان کا کہنا تھا کہ ماحول میں کچھ مختلف لانا چاہیے، پاکستان ٹیم نے حالیہ دنوں میں ٹیسٹ کرکٹ میں کافی اچھی کارکردگی کا مظاہرہ کیا ہے جب کہ ان کی ٹیم میں کچھ دلچسپ کھلاڑی بھی شامل ہوئے ہیں۔

کرسٹینا میتھیوز کہتی ہیں کہ ہم نے پاکستانی کھلاڑیوں کو بگ بیش لیگ میں کھیلتے ہوئے دیکھا ہے لہذا میرے خیال میں ایک مختلف حریف کا ہونا اچھا ہوگا۔

انہوں نے اعلان کیا کہ آئندہ چند ہفتوں میں پرتھ میں پاکستان ٹیسٹ کی میزبانی کے امکان پر بات کرنے کے لیے کرکٹ آسٹریلیا کے ساتھ فالو اپ کریں گی۔