تمیم اقبال کی ریٹائرمنٹ کے بعد لٹن داس بنگلادیش کرکٹ ٹیم کی قیادت سنبھالیں گے۔

بنگلا دیش کرکٹ ٹیم نے رواں ہفتے تجربہ کار اوپنر تمیم اقبال کی ریٹائرمنٹ کے بعد لٹن داس کو افغانستان کے خلاف ون ڈے سیریز کے بقیہ میچز کے لیے کپتان مقرر کیا ہے۔

بارش سے متاثرہ سیریز کے پہلے میچ کے بعد تمیم اقبال نے جمعرات کو بین الاقوامی کرکٹ سے فوری ریٹائرمنٹ کا اعلان کیا تھا جب کہ اس موقع پر وہ رو پڑے تھے۔ بنگلادیشن کو پہلے میچ میں 17 رنز سے شکست کا سامنا کرنا پڑا تھا۔

چٹاگانگ میں تمیم اقبال کی جذباتی پریس کانفرنس بنگلا دیش کرکٹ بورڈ کے صدر نظم الحسن کی جانب سے شدید تنقید کے بعد سامنے آئی تھی۔

صدر نظم الحسن نے تمیم اقبال کے 100 فیصد فٹ نہ ہونے کے باوجود میچ کھیلنے پر ان کی پیشہ ورانہ مہارت کو سوالیہ نشان قرار دیا تھا۔

لٹن داس نے جون میں افغانستان کے خلاف واحد ٹیسٹ میچ میں بنگلہ دیش کی قیادت کی تھی جب کہ اس میچ میں انہیں 546 رنز سے ریکارڈ کامیابی حاصل ہوئی تھی۔

اس موقع پر لٹن داس کہتے ہیں کہ ٹیم کی توجہ مستقبل پر مرکوز ہے کیونکہ وہ ہفتہ کو سیریز برابر کرنا چاہتے ہیں۔

لٹن داس نے نامہ نگاروں کو بتایا کہ یہ کہنا مشکل ہے کہ کیا ہم ان کی کمی محسوس کریں گے۔ اگر میں آج زخمی ہوں تو ٹیم مجھے یاد نہیں کرے گی۔

ان کا کہنا تھا کہ ’’آگے بڑھیں گے اور نئے آنے والے آتے رہیں گے۔ ایک دن ہم بھی جائیں گے، چونکہ وہ وہاں نہیں ہے ہمیں اس موضوع پر زیادہ بات نہیں کرنی چاہیے‘‘۔

انہوں نے اعتراف کیا کہ تمیم اقبال کے استعفیٰ نے ٹیم کو حیرت میں ڈال دیا تھا کیونکہ ہم میں سے کوئی بھی یہ نہیں سمجھ سکتا تھا کہ یہ فیصلہ آنے والا ہے‘‘۔

انہوں نے مزید کہا کہ ’’تمیم اقبال نے بنگلا دیشی ٹیم کو اتنے سالوں تک بہت کچھ دیا اور ٹیم کی قیادت کی۔ میں اور ہمارے تمام ساتھی ان کے فیصلے کا احترام کرتے ہیں‘‘۔