بابر اعظم اور محمد رضوان کو آرام دینے سے متعلق خبروں پر ردعمل دیتے ہوئے کامران اکمل نے کہا کہ پاکستان نیپال نہیں بلکہ نیوزی لینڈ کا دورہ کرنے جارہا ہے۔

پاکستان نے نیوزی لینڈ کے خلاف 12 جنوری سے شروع ہونے والی ٹی ٹوئنٹی سیریز کے لیے 17 رکنی قومی اسکواڈ کا اعلان کیا ہے جس میں بابر اعظم اور محمد رضوان بھی شامل ہیں۔

مقامی ٹی وی چینل کو انٹرویو دیتے ہوئے پاکستان کرکٹ بورڈ کی سلیکشن کمیٹی کے کنسلٹنٹ کامران اکمل نے کہا ’’ ٹیم مینجمنٹ یا سلیکشن کمیٹی میں سے کسی نے بھی نیوزی لینڈ کے خلاف سیریز کے لیے بابر اور رضوان کو آرام دینے کی بات نہیں کی‘‘۔

انہوں نے کہا ’’پاکستان نیپال نہیں نیوزی لینڈ جارہا ہے جہاں سینئر کھلاڑیوں کو آرام دینے کا کوئی سوچ بھی نہیں سکتا‘‘۔

شان مسعود کی کپتانی سے متعلق کامران اکمل نے کہا ’’جب کسی کو بھی قیادت یا کوچنگ کی ذمہ داری دی جائے تو اسے چھ سے آٹھ ماہ کا وقت دیا جائے اور پھر اس کے بعد ہی کوئی فیصلہ کیا جائے‘‘۔

یاد رہے کہ پاکستان کرکٹ ٹیم دورہ نیوزی لینڈ پر 5 ٹی ٹوئنٹی میچز کھیلے گی جس کا آغاز 12 جنوری سے ہونے جارہا ہے جب کہ پہلا میچ آکلینڈ میں شیڈول ہے۔

دوسرا میچ 14 جنوری کو ہیملٹن میں کھیلا جائے گا جب کہ تیسرا میچ 17 جنوری کو ڈونیڈن، چوتھا میچ 19 جنوری کو کراسٹ چرچ اور پانچواں و آخری میچ 21 جنوری کو کراسٹ چرچ میں ہی کھیلا جانا ہے۔

دورہ نیوزی لینڈ کے لیے پاکستانی اسکواڈ:

شاہین شاہ آفریدی(کپتان)، عامر جمال، عباس آفریدی، ابرار احمد، اعظم خان، بابر اعظم، فخر زمان، حارث رؤف، حسیب اللہ، افتخار احمد، محمد نواز، محمد رضوان (وکٹ کیپر)، محمد وسیم جونیئر، صاحبزادہ فرحان، صائم ایوب، اسامہ میر اور زمان خان۔