کھیلوں کی دنیا کا سب سے بڑا میلہ پیرس اولمپکس تمام تررعنائیوں اوردلکشی کے ساتھ اپنے اختتام کوپہنچ گیا۔

اختتامی تقریب میں  اسٹڈ ڈی فرانس روشنیوں سے جگمگا اٹھا۔ فنکاروں کی جاندارپرفارمنس اور لائٹ شو نے دل موہ لیے۔ تقریب کی رنگینی اور دلکشی نے شائقین کواپنے سحرمیں جکڑلیا،رنگ برنگے مناظر نے سماں باندھ دیا۔

تقریب میں  اسٹیڈیم میں تمام ممالک کے جھنڈے لہرائے گے،ایتھلیٹس نے مارچ پاسٹ کیا اور موسیقی کا تڑکا بھی خوب لگا۔ فنکاروں کی پرفارمنس نے لہو گرمایا جبکہ اولمپک فلیگ 2026 کے میزبان شہرلاس اینجلس کے حکام کے حوالے کیا گیا۔

مشن امپاسیبل کے ہیرو معروف امریکی اداکار ٹام کروز نے دھماکے دارانٹری دے کرمداحوں کودنگ کردیا۔ ٹام کروزنے اسٹیڈیم کی چھت سے نیچے چھلانگ لگائی، فینزسےخوش دلی سے ملے اور اولمپک فلیگ لے کر بائیک پراسٹیڈیم سے روانہ ہوئے اورپیرس کی سڑکوں پرگشت کیا۔

انٹرنیشنل اولمپک کمیٹی کےصدرتھامس باخ کے اعلان کے بعد تمام براعظموں کے ایتھلیٹس اور رفیوجی اولمپک ٹیم نے مل کر 17روزتک روشن رہنے والی اولمپک مشعل کوبجھادیا۔

تقریب کے آخرمیں آتش بازی کا شاندارمظاہرہ بھی کیا گیا جس سے آسمان رنگ و نور میں نہا گیا۔

اختتامی تقریب میں پاکستان کی نمائندگی اسپرنٹرفائقہ ریاض نے کی۔

 پیرس اولمپکس میں امریکہ 40 گولڈ اور مجموعی طورپر126 تمغوں کے ساتھ پہلے نمبرپررہا۔ چین نے 40 گولڈ میڈل کے ساتھ ہی دوسری پوزیشن حاصل کی۔  جاپان بھی 40 سونے کے تمغوں کےساتھ تیسرے نمبرپررہا۔

ارشد ندیم کے گولڈ میڈل کی بدولت پاکستان میڈلز ٹیبل پرڈومینیکا ری پبلک کےساتھ مشترکہ طورپر62ویں نمبرپررہا۔ ٹیبل پربھارت پاکستان سے نیچے رہا،بھارت 6 میڈلز کےساتھ 71ویں نمبرپررہا۔