سابق کپتان سرفراز احمد نے سعود شکیل کو نائب کپتان بنانے کے فیصلے پر ان کی حمایت کا اعلان کردیا۔

پاکستان کرکٹ بورڈ کی سلیکشن کمیٹی نے بنگلادیش کے خلاف ٹیسٹ سیریز کے لیے 17 رکنی قومی اسکواڈ کا اعلان کیا ہے۔

قومی اسکواڈ کی قیادت شان مسعود کریں گے جب کہ نوجوان کھلاڑی اور مڈل آرڈر بلے باز سعود شکیل کو نائب کپتان مقرر کیا گیا ہے۔

مقامی چینل پر گفتگو کرتے ہوئے سابق کپتان سرفراز احمد نے پی سی بی کی جانب سے سعود شکیل کو ٹیسٹ ٹیم کا نائب کپتانی بنانے کے فیصلے کو سراہا۔

انہوں نے سعود شکیل کو مبارکباد پیش کرتے ہوئے کہا ’’پاکستان کرکٹ ٹیم کا نائب کپتان بننا بڑے اعزاز کی بات ہے‘‘۔

سابق کپتان کا کہنا تھا ’’ایسے جونیئر کھلاڑیوں تیار ہورہے ہیں جو نچلی سطح پر بھی کپتانی کرچکے ہیں جب کہ تمام ہی کھلاڑی باصلاحیت ہیں اور تمام نوجوان کھلاڑی اچھی کارکردگی کا بھی مظاہرہ کررہے ہیں، جس کو بھی موقع ملے وہ اچھا پرفارم کرے‘‘۔

خیال رہے کہ ہیڈ کوچ جیسن گلیپسی اور اسسٹنٹ کوچ اظہر محمود کی نگرانی میں پاکستان ٹیسٹ ٹیم کا تربیتی کیمپ 11 اگست سے راولپنڈی کرکٹ اسٹیڈیم میں شروع ہونے جارہا ہے۔

دوسری جانب بنگلادیش کی ٹیسٹ ٹیم کا 17 اگست تک اسلام آباد پہنچنے کا امکان ہے جب کہ دونوں ٹیموں کے درمیان پہلا ٹیسٹ 21 سے 25 اگست کے دوران راولپنڈی اور دوسرا 30 اگست سے 3 ستمبر کے دوران کراچی میں کھیلا جائے گا۔