پیرس اولمپکس کے جیولن تھرو فائنل میں فخر پاکستان ارشد ندیم میڈل کا عزم لیے میدان میں اتریں گے۔ 

بھارت کے نیرج چوپڑا سمیت 12 ایتھلیٹس ایکشن میں ہوں گے، ارشد ندیم 32 سال بعد اولمپکس میں پاکستان کی میڈل جیتنے کی واحد امید ہیں۔

پیرس میں جیولن تھرو فائنل کا لائیو ایکشن پاکستانی وقت کے مطابق رات 11 بجکر 25 منٹ پر شروع ہوگا۔

فائنل 2 مرحلوں پر مشتمل ہوگا، پہلے اسٹیج میں تمام ایتھلیٹس 3،3 مرتبہ جیولن پھینکیں گے، 3 باریوں کے بعد 8 بہترین ایتھلیٹس کو مزید 3،3 باریاں ملیں گی۔

 فائنل کے آرڈر کے مطابق ارشد ندیم کو تھرو کے لئے چوتھا نمبر الاٹ کیا گیا ہے، مجموعی 6 باریوں میں سب سے بہتر تھرو پلیئرکی حتمی تھرو قرار پائے گی۔

کوالیفائنگ راؤنڈ میں ارشد ندیم کی پہلی ہی تھرو کارگرثابت ہوئی تھی اور انہوں نے 86.59 کی سیزن بیسٹ تھرو کے ساتھ فائنل کے لئے کوالیفائی کیا تھا۔

بھارت کے نیرج چوپڑا سمیت فائنل میں شامل 4 ایتھلیٹس کی سیزن بیسٹ تھروارشد ندیم سے بہترہیں۔

 فائنل میں شامل 12 ایتھلیٹس میں سے 5 ایتھلیٹس 90 میٹر سے طویل تھرو کا پرسنل بیسٹ رکھتے ہیں۔

دوسری جانب ارشد ندیم نے اپنے ایک پیغام میں فائنل میں کامیابی کے لئے قوم سے دعاؤں کی اپیل کی اور کہا کہ قوم کی محبت اور دعاؤں کی بدولت فائنل میں پہنچا جس پرسب کا شکرگزارہوں۔

انہوں نے مزید کہا کہ دعا کریں فائنل میں بھی بہترین کارکردگی پیش کرکے پاکستان کے لئے میڈل لاسکوں۔

واضح رہے کہ ارشد ندیم پیرس اولمپکس میں پاکستان کو میڈل جتوا کر تاریخ میں اپنا نام سنہری حروف میں درج کرواسکتے ہیں، کیا آج اولمپکس میں میڈل کا 32 سالہ قحط ختم ہوپائے گا؟ پوری قوم خوشخبری کی منتظر ہے۔