سابق بھارتی کھلاڑی سارو گنگولی نے خبردار کرتے ہوئے کہا کہ پاکستان میں کرکٹ کا ٹیلنٹ ختم ہوتا دکھ رہا ہے۔

بھارتی کرکٹ بورڈ کے سابق چیئرمین و کھلاڑی سارو گنگولی نے پاکستان کرکٹ ٹیم کی حالیہ کارکردگی پر افسوس کا اظہار کرتے ہوئے خبردار کیا ہے۔

انہوں نے پاکستان کرکٹ ٹیم کو تنقید کا نشانہ بناتے ہوئے کہا کہ پاکستان میں کرکٹ کا ٹیلنٹ ختم ہوتا دکھ رہا ہے جب کہ پاکستان میں حقیقی ٹیلنٹ کی بھی کمی ہوتی جارہی ہے۔

ان کا کہنا تھا کہ جب بھی پاکستان کے بارے میں سوچتے ہیں تو ہمیں جاوید میانداد، وسیم اکرم، وقار یونس، سعید انور، یونس خان اور محمد یوسف کا خیال ذہن میں آتا ہے۔

سارو گنگولی نے کہا کہ یہ نام پاکستان کرکٹ کی پہچان ہیں لیکن ایسا ٹیلنٹ ہمیں پاکستان کی جدید کرکٹ میں نظر نہیں آرہا جب کہ ہر نسل کو آگے بڑھنے کے لیے شاندار کھلاڑی پیدا کرنے ہوتے ہیں۔

سابق بھارتی کھلاڑی کہتے ہیں کہ ماضی میں ہم نے پاکستان کو ویسٹ انڈیز اور بھارت میں ہونے والے ورلڈکپ اور پھر بنگلادیش کے خلاف سیریز میں دیکھا جس میں ان کی کارکردگی مایوس کن رہی اور انہیں پے درپے شکستوں کو سامنا کرنا ہڑا۔

انہوں نے مزید کہا کہ پاکستان میں ٹیلنٹ کی کمی ہوتی جارہی ہے ، پاکستان میں کرکٹ سے جڑے لوگوں کو اس پر سوچنا چاہیے۔