آصف علی کی تباہ کن پرفارمنس کے باعث پاکستان نے ہانگ کانگ سکسز ٹورنامنٹ میں بھارت کو شکست دے کر کوارٹر فائنل کے لیے کوالیفائی کرلیا۔

ہانگ کانگ سکسز ٹورنامنٹ کا راؤنڈ میچ پاکستان اور بھارت کی ٹیموں کے درمیان مونگ کوک اسٹیڈٰیم میں کھیلا گیا جس میں پاکستان نے 6 وکٹوں سے کامیابی اپنے نام کی۔

اس فتح کے ساتھ ہی پاکستان نے کورٹر فائنل میں اپنی جگہ پکی کرلی ہے جب کہ اس سے قبل پاکستان نے راؤنڈ میچ میں متحدہ عرب امارات کو 13 رنز سے شکست دی تھی۔

بھارت نے پہلے بیٹنگ کرتے ہوئے مقررہ 6 اوورز میں 2 وکٹوں کے نقصان پر 120 رنز کا ہدف دیا جس کو پاکستان نے باآسانی 5 اوورز میں بغیر کوئی گنوائے حاصل کرلیا۔

اسٹار بلے باز آصف علی نے جارحانہ بیٹنگ کا مظاہرہ کرتے ہوئے 392.85 کے اسٹرائیک ریٹ کے ساتھ 2 چوکوں اور 7 چھکوں کی بدولت صرف 14 گیندوں پر 55 رنز اسکور کیے جس کے بعد وہ ریٹائر ہرٹ ہوگئے۔

علاوہ ازیں محمد اخلاق 333.33 کے اسٹرائیک ریٹ سے 12 گیندوں پر 3 چوکوں اور 4 چھکوں کی مدد سے 40 رنز بناکر ناٹ آؤٹ رہے جب کہ کپتان فہیم اشرف نے 5 گیندوں پر 22 رنز اسکور کیے۔

خیال رہے کہ ٹورنامنٹ میں 12 ٹیمیں حصہ لے رہی ہیں جب کہ کوارٹر فائنل میچز 2 نومبر جب کہ سیمی فائنل اور فائنل کے میچز 3 نومبر کو شیڈول ہیں۔