لاہور: پی سی بی کی جانب سے بلائنڈ کرکٹ ٹیم کے لیے ایک کروڑ روپے انعام کا اعلان کردیا گیا۔

چیئرمین پاکستان کرکٹ بورڈ محسن نقوی نے ٹی ٹوئنٹی ورلڈکپ جیتنے والی بلائنڈ کرکٹ ٹیم کے کھلاڑیوں سے ملاقات کی جب کہ اس دوران انہوں نے کھلاڑیوں کی بھرپور حوصلہ افزائی بھی کی۔

چیئرمین پی سی بی نے کھلاڑیوں کو نیشنل کرکٹ اکیڈمی میں اپنا خصوصی مہمان بنایا اور ٹی ٹوئنٹی ورلڈکپ جیتنے پر بلائنڈ کرکٹ ٹیم کے کھلاڑیوں کو ایک کروڑ روپے کا چیک دیا۔

علاوہ ازیں چیئرمین پی سی بی محسن نقوی نے بلائنڈ کرکٹ ایسوسی ایشن کو بھی 2 کروڑ روپے کی گرانٹ کا چیک دیا۔

چئیرمین پی سی بی نے بلائنڈ کرکٹ ٹیم کے کھلاڑیوں کو ٹی ٹوئنٹی ورلڈ کپ جیتنے پر مبارکباد دیتے ہوئے کھلاڑیوں کی شاندار کارکردگی کو سراہا۔

محسن نقوی نے بلائنڈ کرکٹ ٹیم کے کپتان نثار علی اور چیئرمین بلائنڈ کرکٹ ایسوسی ایشن سلطان شاہ کو بھی خصوصی طور پر مبارک باد دی۔

اس موقع پر انہوں نے کہا کہ آپ کی جیت پاکستان کی جیت ہے، آپ نے ٹی ٹوئنٹی ورلڈکپ جیت کر پاکستان کا نام روشن کیا ہے۔ بلائنڈ کرکٹ ورلڈکپ جیتنے سے قوم کو خوشیاں ملی ہیں، بلائنڈ کرکٹ ٹیم کے کھلاڑی ہمارے لئے بہت اہمیت رکھتے ہیں۔

محسن نقوی کہتے ہیں کہ بلائنڈ کرکٹ ٹیم کے کھلاڑیوں کو پورا سپورٹ کریں گے اور ان کی ضروریات کو پورا کیا جائے گا، امید ہے کہ آپ فتوحات کا سلسلہ برقرار رکھیں گے۔

چیئرمین بلائنڈ کرکٹ ایسوسی ایشن سلطان شاہ نے کہا کہ بلائنڈ کرکٹ ٹیم کی بھرپور سپورٹ پر چیئرمین پی سی بی محسن نقوی کا شکریہ ادا کرتے ہیں۔

کپتان بلائنڈ کرکٹ ٹیم نثار علی نے کہا کہ آپ نے ہمیشہ ہمارا خیال رکھا ہے، آپ نے ہمیں عزت واحترام دیا۔ بہت شکریہ۔

اس موقع پر ایڈوائزر عامر میر، وہاب ریاض، چیف فنانشل آفیسر، ڈائریکٹرز انٹرنیشنل کرکٹ، نیشنل کرکٹ اکیڈمی، ڈومیسٹک کرکٹ، اظہر علی اور بلائنڈ کرکٹ ٹیم کے عہدیداران اور کھلاڑی بھی موجود تھے۔

بعد ازاں چیئرمین پی سی بی نے میڈیا سے گفتگو کی اور بتایا کہ پاکستان بلائنڈ کرکٹ ٹیم کا ورلڈکپ جیتنا بڑا اعزاز ہے، پاکستان بلائنڈ کرکٹ ٹیم نے پاکستان کا سر فخر سے بلند کیا ہے۔

محسن نقوی نے کہا کہ بہت تھوڑے وقت میں ٹیم میں چیزیں بہترکرنے کی کوشش کی، جس طرح انڈر19، پاکستان شاہین اہم ہیں، بلائنڈ ٹیم بھی اہم ہے۔

چیئرمین پی سی بی مزید کہتے ہیں کہ بلائنڈ کرکٹ ٹیم کو بھی سپورٹ کریں گے، سی او او کو ہدایت کردی ہے کہ بلائنڈ کرکٹ ٹیم کو اونرشپ دیں گے۔