چیمپئنز ٹرافی کی جرسی پر پاکستان کے نام کا معاملے پر آئی سی سی نے بھارت کو دوٹوک پیغام دے دیا۔

انٹرنیشنل کرکٹ کونسل (آئی سی سی) کا کہنا ہے کہ ابھی تک آئی سی سی چیمپئنز ٹرافی کی کٹ نہیں ملی اور تمام ٹیموں کی کٹ پر آئی سی سی کا منظور شدہ لوگو استعمال ہوگا۔

انٹرنیشنل کرکٹ کونسل نے بتایا کہ لوگو کا استعمال لازمی ہے جب کہ تمام ٹیمیں پلیئنگ اور ٹریننگ کٹس آئی سی سی کو منظوری کے لئے بھیجتی ہیں۔

آئی سی سی کا کہنا تھا کہ لوگو کا درست استعمال نہ ہونے پر آئی سی سی کٹ کو مسترد کردیتی ہے جب کہ لوگو کا درست استعمال نہ کرنا کلودنگ اینڈ ایکوپمنٹ ریگولیشن کی خلاف ورزی ہوگی۔

خیال رہے کہ آئی سی سی چیمپئنز ٹرافی سے قبل بھارتی بورڈ نے نیا تنازعہ کھڑا کرتے ہوئے جرسی پر ’پاکستان‘ کا نام لکھوانے پر اعتراض اُٹھادیا ہے۔

پاکستان کی میزبانی میں آئی سی سی چیپئنز ٹرافی کا آغاز رواں سال 19 فروری سے ہونے جارہا ہے جس کے میچز 9 مارچ تک جاری رہیں گے۔

بھارت کی جانب سے پاکستان میں کھیلنے سے انکار کے بعد ان کے میچز ہائبرڈ ماڈل کے تحت دبئی منتقل کردیے گئے ہیں۔

واضح رہے کہ پاکستان ایونٹ کی میزبانی کررہا ہے اور آئی سی سی قوانین کے تحت جو ملک ایونٹ کی میزبان کررہا ہو اس کا نام جرسی پر درج ہوتا ہے۔