سابق بھارتی کرکٹر آکاش چوپڑا نے پاکستان کی میزبانی میں چیمپئنز ٹرافی 2025 کی تیاریوں پر تشویش کا اظہار کردیا۔

سابق بھارتی کرکٹر آکاش چوپڑا نے یوٹیوب ویڈیو پر جاری بیان میں پاکستان کی میزبانی میں چیمپئنز ٹرافی 2025 کی تیاریوں پر تشویش کا اظہار کرتے ہوئے مقامات کو وقت پر تیار کرنے کی صلاحیت پر شکوک کا اظہار کیا ہے۔

آکاش چوپڑا نے کہا سچ تو یہ ہے کہ ان کے میدان وقت پر تیار نہیں، چاہے آپ کتنا ہی لوگوں کو کام پر لگادیں لیکن ہر کام کے لیے مطلوبہ وقت درکار ہوتا ہے۔

انہوں نے 31 جنوری تک اسٹیڈیم کو آئی سی سی کے حوالے کرنے کی ڈیڈلائن پر روشنی ڈالتے ہوئے کہا کہ پاکستان ڈیڈلائن سے بہت پیچھے ہے جب کہ ویڈیوز ہمیشہ قذافی اسٹیڈیم کی ہی سامنے آتی ہیں۔

ان کا کہنا تھا کہ اگر آپ کے گراؤنڈز اب بھی تیار نہیں اور اگر آپ 31 جنوری تک آئی سی سی کو گراؤنڈز حوالے نہیں کرتے ہیں تو آئی سی سی کسی بھی مرحلے پر کال کرسکتا ہے۔

انہوں نے متبادل مقامات کی نشاندہی کرتے ہوئے کہا کہ اگر پاکستان ضروریات کو پورا کرنے میں ناکام رہتا ہے تو متحدہ عرب امارات ٹورنامنٹ کا ممکنہ میزبان ہوسکتا ہے۔

واضح رہے کہ چیمپئنز ٹرافی 2025 کا آغاز 19 فروری سے ہونے جارہا ہے جس کے میچز 9 مارچ تک جاری رہیں گے جب کہ ایونٹ کے میچز ہائبرڈ ماڈل کے تحت پاکستان کے علاوہ متحدہ عرب امارات میں بھی کھیلے جائیں گے۔