لاہور کے قذافی اسٹیڈیم میں چیمپئنز ٹرافی کے اہم میچ میں آسٹریلیا اور افغانستان مدمقابل تھے جو بارش کے باعث منسوخ کر دیا گیا۔

بارش کے باعث آسٹریلوی بیٹنگ کے دوران میچ روکنا پڑا، مسلسل بارش کے باعث میچ شروع نہ ہو سکا، فیلڈ امپائر نے میچ کی منسوخی کا اعلان کرتے ہوئے دونوں ٹیموں کا ایک ایک پوائنٹ دے دیا۔

ایک پوائنٹ کی بدولت آسٹریلیا چیممپئنز ٹرافی کے سیمی فائنل میں پہنچ گیا۔

آئی سی سی چیمپئنز ٹرافی کے 10 ویں گروپ میچ میں افغانستان اور آسٹریلیا کی ٹیمیں لاہور کے قذافی اسٹیڈیم میں مدمقابل ہوئیں جس میں افغانستان نے ٹاس جیت کر بیٹنگ کا فیصلہ کیا۔

افغانستان کی ٹیم پہلے کھیلتے ہوئے مقررہ 50 اوورز میں 273 رنز بناکر آل آؤٹ ہوگئی جب کہ صدیق اللہ اتل 85 رنز کے ساتھ نمایاں بلے باز رہے۔

علاوہ ازیں عظمت اللہ عمرزئی 67، ابراہیم زدران 22، کپتان حشمت اللہ شاہدی 20، راشد خان 19 اور رحمت شاہ 12 رنز بناکر آؤٹ ہوئے۔

آسٹریلیا کی جانب سے بین ڈورشوئس نے 3 کھلاڑیوں کو آؤٹ کیا جب کہ اسپینسر جانسن اور ایڈم زمپا نے 2،2 وکٹیں حاصل کیں۔ گلین میکسویل اور ناتھن ایلیس کے حصے میں ایک ایک وکٹ آئی۔

جواب میں آسٹریلیا کی بیٹنگ جاری تھی اور 12.5 اوورز میں 1 وکٹ کے نقصان پر 109 رنز اسکور کرلیے تھے تاہم بارش کے باعث میچ کو روکنے کا فیصلہ کیا گیا۔

افغانستان الیون:

کپتان حشمت اللہ شاہدی، ابراہیم زدران، رحمان اللہ گرباز، صدیق اللہ اتل، رحمت شاہ، عظمت اللہ عمرزئی، محمد نبی، گلبدین نائب، راشد خان، نور احمد اور فضل الحق فاروقی۔

آسٹریلیا الیون: 

کپتان اسٹیو اسمتھ، ٹریوس ہیڈ، میٹ شارٹ، مارنس لیبوشین، جوش انگلس، الیکس کیری، گلین میکسویل، بین ڈورشوئس، نیتھن ایلس، ایڈم زمپا اور اسپینسر جانسن۔