اسلام آباد: سابق ٹیسٹ کرکٹر شعیب اختر نے کیپیٹل پریمیئر لیگ کو بطور ایمبیسیڈر اور مینٹور جوائن کرلیا۔

اسلام آباد میں سجی کیپیٹل پریمیئر لیگ کی سائننگ سرمنی میں شعیب اختر نے بطور مہمان خصوصی شرکت کی جب کہ راولپنڈی ایکسپریس نے پریمیئر لیگ کو برانڈ ایمبیسڈر مقرر کیا گیا ہے۔

کرکٹ لیجنڈ شعیب اختر نے کیپیٹل پریمیئر لیگ کی سائننگ سرمنی کی تقریب میں خطاب کرتے ہوئے کہا کہ کیپیٹل پریمیئر لیگ بیرون ملک مقیم پاکستانیوں کو جوڑنے کی بنیاد رکھنے جارہی ہے جو کہ  ایک سنگ میل ثابت ہوگا۔

انہوں نے کہا کہ یہ بیرون ملک مقیم پاکستانیوں کو پاکستان سے جوڑے گا، گرین پاکستان کے ساتھ مل کر کیپٹل پریمیئر لیگ پاکستان میں سیاحت کے فروغ کے لیے بھی کام کرے گی۔

انہوں نے کیپیٹل پریمیئر لیگ کا حصہ بننے پر خوشی کا اظہار کرتے ہوئے کہا کہ میں انشاء اللہ بیرون ملک مقیم پاکستانیوں کو پاکستان سے جوڑنے میں اپنا کردار ادا کروں گا اور کیپیٹل پریمیئر کو انشا اللہ کامیاب بنائیں گے جب کہ اس کے ذریعے پورے پاکستان میں ٹیلنٹ تلاش کریں گے اور اس لیگ کو بڑا بنائیں گے۔

ان کا کہنا تھا کہ اور میں چاہتا ہوں کہ بابر اعظم سپر اسٹار بنیں کیونکہ یہ ان کا دور ہے، اس لیگ کا بنیادی مقصد بیرون ملک مقیم پاکستانیوں کو دوبارہ سے اپنے ملک کے ساتھ جوڑنا ہے۔ میں محسن نقوی صاحب کو مبارکباد پیش کرتا ہوں کہ ان کی کاوشوں سے اتنا کامیاب ایونٹ ہوا۔

شعیب اختر کہتے ہیں کہ محسن نقوی نے انفراسٹرکچر بہتر کیا، ہم ملک کو بہترین ٹیلنٹ دیں گے۔ ہم جرمنی، آسٹریلیا، سعودیہ اور انگلینڈ ہر جگہ سے ٹیلنٹ لے کر آئیں گے۔

سابق ٹیسٹ کرکٹر کا کہنا تھا کہ آئینہ بدلنے سے لوگ نہیں بدلیں گے، محسن نقوی پاکستان کی کرکٹ کو ٹھیک کرنا چاہتے ہیں، مینجمنٹ کو پورا موقع دینا چاہیے۔ شاداب کو کیوں باہر کیا گیا تھا؟ کیوں لے کر آئے ہیں؟ نہیں معلوم۔

انہوں نے کہا کہ سی پی ایل ملک کی کرکٹ کی بہتری کے لیے کام کرنا چاہتی ہیں، شاہین شاہ آفریدی، حارث رؤف اور نسیم شاہ بہت زیادہ کرکٹ کھیل رہے ہیں، ان کو ریسٹ دینا پڑے گا۔ حارث رؤف اور شاہین شاہ آفریدی کو صحیح سے مینیج نہیں کیا گیا۔

شعیب اختر نے بتایا کہ ہر ورلڈکپ میں کپتان اور مینجمنٹ تبدیل ہوجاتی ہے، سلمان آغا ونڈے کے بہتر کھلاڑی ہیں، انہیں ٹی 20 کا کپتان بنادیا ہے۔ جو اب ٹیم سلیکٹ کی وہ چیمپیئنز ٹرافی کے لیے کرنی چاہیے تھی۔

ان کا یہ بھی کہنا تھا کہ محسن نقوی کے پاس بہترین چانس ہے، پی ایس ایل 2.0 کروائی جائے، ٹیمیں انڈر 16 اور 19 سے بنتی ہیں، ہماری انڈر 16 اور 16 ٹیمیں باہر کا ٹوئر ہی نہیں کرتیں۔

انہوں نے یہ بھی بتایا کہ چیئرمین پی سی بی محسن نقوی صاحب نے مجھے پی سی بی میں ملازمت کی آفر کی تھی۔ کرکٹ کا ہاکی والا حال کیا جارہا ہے جب کہ فین فالوئنگ ختم ہورہی ہے، لیجنڈز پیدا نہیں ہورہے، لوگ رونالڈو کو فالو کر رہے ہیں۔