لاہور: پاکستان کرکٹ بورڈ (پی سی بی) نے ملکی تاریخ میں پہلی بار گراس روٹ لیول پر ٹیلنٹ ہنٹ پروگرام شروع کرنے کا اعلان کردیا۔

ترجمان پی سی بی کے مطابق ٹیلنٹ ہنٹ پروگرام میں ملک بھر سے اسکولوں کے بچوں کو میرٹ پر منتخب کیا جائے گا جب کہ پروگرام کا مقصد کرکٹ کے فروغ اور نوجوان کھلاڑیوں کو مواقع فراہم کرنا ہے۔

پی سی بی حکام کی جانب لاہور میں ہونے والی پریس کانفرنس میں اعلان کیا گیا کہ ٹیلنٹ ہنٹ پروگرام کے لیے رجسٹریشن کا آغاز اگلے مہینے سے ہوگا۔

سی او او پی سی بی سمیر احمد سید کے مطابق10  اپریل سے 10 مئی تک اسکول اور کالج کے بچوں کی رجسٹریشن کرائی جائے گی جب کہ ستمبر میں ایک ٹورنامنٹ کا انعقاد کیا جائے گا جس کے تمام اخراجات پی سی بی اٹھائے گا۔

سی او او پی سی بی نے کہا کہ اس پروگرام کے ذریعے انڈر 15 اور انڈر 17 کے لیے بہترین کھلاڑیوں کی کھیپ میئسر آئے گی اور گراس روٹ لیول پر کرکٹ کو فروغ ملے گا۔

انہوں نے اعتراف کیا کہ اسکول اور کالج لیول پر کرکٹ ختم ہوتی جارہی ہے، اسی لیے آؤٹ ریچ پروگرام کے ذریعے بچوں کو کرکٹ کے اصولوں سے متعارف کرانے کی کوشش کی جارہی ہے۔

ٹیلنٹ ہنٹ پروگرام میں لڑکیوں کو بھی مواقع دیے جائیں گے

پی سی بی کی رافعہ حیدر نے کہا کہ چاروں صوبوں کی بچیوں کو کرکٹ میں آگے آنے کا موقع دیا جائے گا جب کہ ویمنز کرکٹ کے کوالیفائرز کے لیے سخت محنت کی جارہی ہے۔

انہوں نے واضح کیا کہ سلیکٹرز ہی فیصلہ کریں گے کہ ویمنز ٹیم میں کون اِن ہوگا اور کون آؤٹ۔

ٹرائلز کے بجائے اسکولوں کو اختیار دیا جائے گا

جی ایم ڈومیسٹک پی سی بی کے مطابق اسکول لیول پر اسٹرکچر ڈیولپمنٹ ناگزیر ہے اور اسی لیے ٹرائلز کے روایتی نظام کو ختم کرکے اسکولوں کو اپنی ٹیمیں خود بنانے کا اختیار دیا جائے گا۔

انہوں نے کہا کہ نجی اور سرکاری اسکولوں، دونوں کو اس پروگرام میں نمائندگی دی جائے گی جب کہ بہترین پرفارم کرنے والے کھلاڑیوں کے لیے خصوصی کیمپ بھی لگائے جائیں گے۔