اولمپیئن ارشد ندیم نے جیولن تھرو مقابلے میں شرکت کے لیے بھارت جانے سے انکار کردیا۔

پاکستان کے اولمپیئن جیولن تھرو ایتھلیٹ ارشد ندیم نے بھارت میں ہونے والے بنگلورو کلاسک جیولن تھرو مقابلے میں شرکت سے معذرت کر لی ہے۔ بھارتی اولمپیئن نیرج چوپڑا کی جانب سے دی گئی خصوصی دعوت کے باوجود ارشد ندیم نے مصروف شیڈول کے باعث ایونٹ میں شرکت ممکن نہ ہونے کا عندیہ دیا۔
لاہور میں میڈیا سے گفتگو کرتے ہوئے ارشد ندیم نے کہاہے کہ نیرج چوپڑا نے مجھے یاد رکھا اور ایونٹ میں شرکت کی دعوت دی، میں ان کا شکریہ ادا کرتا ہوں، لیکن مصروفیت کے باعث بنگلورو جانا ممکن نہیں۔
انہوں نے واضح کیا کہ بنگلورو ایونٹ 20 مئی کو شیڈول ہے، جبکہ وہ 22 مئی کو ایشین چیمپیئن شپ میں شرکت کے لیے کوریا روانہ ہوں گے، جو 27 مئی سے شروع ہو رہی ہے۔
یاد رہے کہ ارشد ندیم کی جانب سے بھارت میں ایونٹ میں شرکت سے معذرت ایسے وقت میں سامنے آئی ہے جب پہلگام میں سیاحوں کی ہلاکت کے بعد بھارت اور پاکستان کے تعلقات مزید کشیدہ ہو گئے ہیں۔ بھارتی حکومت نے پاکستان کے خلاف متعدد اقدامات کیے ہیں، جن میں تمام پاکستانی شہریوں کو 48 گھنٹوں میں بھارت چھوڑنے کی ہدایت بھی شامل ہے۔ اس کے ساتھ ساتھ سندھ طاس معاہدہ کی معطلی کا اعلان بھی کیا جا چکا ہے۔