انٹرنیشنل کرکٹ کونسل (آئی سی سی) نے ویمنز ٹی ٹوئنٹی ورلڈ کپ 2026 کے شیڈول کا باضابطہ اعلان کر دیا ہے جس میں پاکستان 14 جون کو روایتی حریف بھارت سے ٹکرائے گا۔

ویمنز ٹی ٹوئنٹی کرکٹ کا یہ دسواں عالمی ایڈیشن اگلے سال 12 جون سے انگلینڈ میں کھیلا جائے گا جس میں دنیا کی بہترین ٹیمیں میدان میں اتریں گی۔

ورلڈ کپ میں پاکستان ویمنز ٹیم گروپ ون کا حصہ ہوگی، جہاں اسے آسٹریلیا، جنوبی افریقا، بھارت اور دو کوالیفائر ٹیموں کا سامنا کرنا ہوگا۔

پاکستان کا پہلا میچ 14 جون کو ایجبسٹن میں روایتی حریف بھارت کے خلاف ہوگا جو ایونٹ کا سب سے ہائی وولٹیج مقابلہ تصور کیا جارہا ہے۔

پاکستان کے میچز کا مکمل شیڈول

پاکستان ویمنز ٹیم اپنا پہلا میچ 14 جون کو بھارت کے خلاف ایجبسٹن میں کھیلے گی۔ دوسرا میچ 17 جون کو جنوبی افریقا کے خلاف بھی ایجبسٹن میں ہی ہوگا۔

یہ بھی پڑھیں: آئی سی سی کا ویمنز کرکٹ ورلڈکپ 2025 کا شیڈول جاری

تیسرا میچ 20 جون کو ایک کوالیفائر ٹیم کے خلاف ساؤتھمپٹن میں ہوگا۔ چوتھا میچ 23 جون کو آسٹریلیا کے خلاف ہیڈنگلے میں ہوگا جب کہ گروپ مرحلے کا آخری میچ 27 جون کو کوالیفائر ٹیم کے خلاف برسٹل کاؤنٹی گراؤنڈ میں کھیلا جائے گا۔

سیمی فائنلز اور فائنل کب اور کہاں ہوں گے؟

ویمنز ٹی ٹوئنٹی ورلڈ کپ کا پہلا سیمی فائنل 30 جون کو اور دوسرا سیمی فائنل 2 جولائی کو منعقد ہوگا۔ دونوں سیمی فائنلز اوول کرکٹ گراؤنڈ میں کھیلے جائیں گے۔

فائنل 5 جولائی کو دنیا کے مشہور ترین کرکٹ اسٹیڈیم لارڈز میں کھیلا جائے گا جو اس عالمی ایونٹ کو یادگار بنائے گا۔