نیوزی لینڈ کرکٹ ٹیم کے سابق کپتان کین ولیمسن نے ٹی ٹوئنٹی انٹرنیشنل کرکٹ سے ریٹائرمنٹ کا اعلان کر دیا۔

نیوزی لینڈ کرکٹ بورڈ نے سماجی رابطے کی ویب سائٹ ’ایکس‘ پر ولیمسن کے فیصلے کی تصدیق کی ہے۔

بورڈ کے مطابق اسٹار بیٹر نے ویسٹ انڈیز کے خلاف آئندہ وائٹ بال سیریز میں شرکت نہ کرنے کا فیصلہ کیا ہے تاکہ وہ دسمبر میں ہونے والی ٹیسٹ سیریز پر توجہ دے سکیں۔

کین ولیمسن نیوزی لینڈ کی جانب سے ٹی ٹوئنٹی میں دوسرے سب سے زیادہ رنز بنانے والے بیٹر ہیں، انہوں نے 2011 میں ڈیبیو کیا اور 93 میچز میں 2 ہزار 575 رنز اسکور کیے، جن میں 18 نصف سنچریاں شامل ہیں۔

ولیمسن کی قیادت میں نیوزی لینڈ نے دو مرتبہ ٹی ٹوئنٹی ورلڈکپ کے سیمی فائنل اور ایک بار فائنل تک رسائی حاصل کی۔