پی ایس ایل کی ٹیم ملتان سلطانز کے مالک علی ترین نے اعلان کیا ہے کہ وہ اب ملتان سلطانز کا حصہ نہیں رہیں گے۔ انہوں نے واضح کیا کہ اصولوں سے سمجھوتہ کرنا ان کے لیے قابل قبول نہیں، اور اسی لیے وہ ٹیم کو الوداع کہنے کا فیصلہ کر چکے ہیں۔
اپنے بیان میں علی ترین نے کہا کہ گھٹنوں کے بل ٹیم چلانے کے بجائے اسے کھو دینا میرے لیے بہتر ہے۔
ملتان سلطانز میں شامل ہونا میری زندگی کا سب سے بڑا اعزاز رہا۔ جنوبی پنجاب کی نمائندگی ہمیشہ میرے دل کے قریب رہی، اور یہ میرے مرحوم چچا کا فخر بھی ہے۔
علی ترین نے مزید کہا کہ ملتان سلطانز صرف اعداد و شمار یا مالی معاملات سے کہیں زیادہ اہمیت رکھتی ہے، اور انہوں نے ہمیشہ مالی نقصانات کے باوجود ٹیم چھوڑنے کا سوچا بھی نہیں۔
انہوں نے نئے مالکان کے لیے بھی نیک تمناؤں کا اظہار کرتے ہوئے کہا کہ انہیں مکمل سپورٹ حاصل رہے گی۔
علی ترین نے واضح کیا کہ ملتان سلطانز مالک سے زیادہ شائقین کی ٹیم ہے، اور جنوبی پنجاب کی ٹیم کے طور پر یہ ہر لمحہ یادگار رہے گی۔
