راولپنڈی: سہ ملکی سیریز کا چھٹا میچ پاکستان اور سری لنکا کے درمیان آج کھیلا جائے گا۔
اس اہم میچ میں دونوں ٹیمیں آج شام 6 بجے راولپنڈی اسٹیڈیم میں مدمقابل ہوں گی، تاہم ٹیبل پوائنٹس پر قومی ٹیم کے پاس 6 جبکہ سری لنکا کے پاس 2 پوائنٹس موجود ہیں۔
میچ کے موقع پر اسٹیڈیم اور ملحقہ علاقوں میں سیکیورٹی کے سخت ترین انتظامات کیے گئے ہیں۔ ٹیموں کی آمد و روانگی کے دوران متعلقہ راستوں پر بھاری پولیس نفری تعینات رہے گی جبکہ میٹرو بس سروس کو ٹیموں کی نقل و حرکت کے وقت جزوی طور پر معطل رکھا جائے گا۔
اسٹیڈیم کے اطراف میں اونچی عمارتوں پر ماہر پولیس نشانہ باز بھی تعینات ہوں گے جبکہ وی آئی پی پارکنگ میں صرف اسٹیکر شدہ گاڑیوں کو داخلے کی اجازت ہوگی۔
مزید پڑھیں: سہ ملکی سیریز، پاکستان نے زمبابوے کو 5 وکٹوں سے زیر کر لیا
کرکٹ شائقین کو ہدایت کی گئی ہے کہ وہ اسٹیڈیم میں داخلے کے وقت اپنی شناختی دستاویزات لازمی ساتھ رکھیں۔
تمام افسران اور اہلکاروں کو میچ کے دوران فیلڈ میں موجود رہنے اور مشکوک افراد و سرگرمیوں پر کڑی نظر رکھنے کی ہدایات بھی جاری کی گئی ہیں۔