لاہور میں دوسری انٹرنیشنل باکسنگ چیمپئن شپ کے موقع پر عالمی شہرت یافتہ باکسر عامر خان نے میڈیا سے گفتگو کرتے ہوئے کہا کہ لاہور میں انٹرنیشنل باکسنگ ایونٹ کا انعقاد خوش آئند ہے اور پاکستان میں کھیلوں کے فروغ کے لیے یہ ایک اہم قدم ہے۔

انہوں نے کہا کہ بین الاقوامی سطح کی فائٹس لاہور میں دیکھ کر بہت خوشی ہو رہی ہے۔

عامر خان نے پنجاب حکومت کے کردار کو سراہتے ہوئے کہا کہ ایونٹ کے انعقاد میں صوبائی حکومت نے اہم کردار ادا کیا ہے۔

 انہوں نے اپنے کیریئر کا حوالہ دیتے ہوئے کہا کہ انہوں نے 2008 میں ورلڈ باکسنگ ٹائٹل جیتا تھا، اور وہ دیکھ رہے ہیں کہ پاکستان بھی کھیلوں میں مسلسل ترقی کی راہ پر گامزن ہے۔

انہوں نے کہا کہ پاکستان میں باکسنگ تیزی سے فروغ پا رہی ہے اور مستقبل روشن دکھائی دے رہا ہے۔

باکسر محمد وسیم کی تعریف کرتے ہوئے عامر خان نے کہا کہ وہ بہترین فائٹر ہیں، ٹریننگ میں بہت محنت کی ہے اور ان کے پاس زبردست سپیڈ اور پاور ہے۔

تھائی لینڈ کے باکسر کے خلاف ہونے والی فائٹ کے حوالے سے عامر خان نے کہا کہ یہ محمد وسیم کے لیے ایک بڑا چیلنج ہے، تاہم وہ اس مقابلے میں فیورٹ ہیں اور انہیں یقین ہے کہ وسیم کی کل کی فائٹ بہت آسان رہے گی۔