پاکستانی شائقین کرکٹ  کے لیے آج کا دن بہت خوشگوار ہے کیونکہ قومی ٹیم اور پاکستان شاہینز آج دو مختلف ایونٹس میں دو مختلف ٹیموں کے مد مقابل آئیں گی۔

تفصیلات کے مطابق چین میں جاری ایشین گیمز مینز کرکٹ ایونٹ کے دوسرے سیمی فائنل میں پاکستان شاہینز کی ٹیم افغانستان کے مدمقابل آئے گی۔

دونوں ٹیموں کے مابین میچ پاکستانی وقت کے مطابق صبح 11 بجے شروع ہوگا۔

خیال رہے کہ ایشین گیمز مینز کرکٹ ایونٹ  ٹی ٹوئنٹی فارمیٹ میں کھیلا جارہا ہے۔

پاکستان شاہینز  کی قیادت قاسم اکرم  کررہے ہیں جبکہ دیگر کھلاڑیوں میں عمیر یوسف، عامر جمال، عرفات منہاس، ارشد اقبال،آصف علی، حیدر علی، خوشدل شاہ، مرزا بیگ، محمد حسنین، محمد اخلاق، روحیل نذیر، شاہنواز دھانی، سفیان مقیم اور عثمان قادر شامل ہیں۔

دوسری جانب گزشتہ روز شروع ہونے والے آئی سی سی کرکٹ ورلڈکپ 2023 میں پاکستان ٹیم اپنا پہلا میچ آج نیدر لینڈز کے خلاف کھیلے گی۔

حیدرآباد میں شیڈول میچ پاکستانی وقت کے مطابق ڈیڑھ بجے شروع ہوگا۔

واضح رہے کہ گزشتہ روز افتتاحی میچ میں دفاعی چیمپئن انگلینڈ  کو رنر اپ نیوزی لینڈ  کے ہاتھوں بدترین شکست کا سامنا کرنا پڑا۔

نیوزی لینڈ نے ٹاس جیت کر انگلینڈ کو بیٹنگ کرنے کی دعوت دی۔ انگلینڈ نے مقررہ 50 اوورز میں 9 وکٹوں کے نقصان پر 282 رنز بنائے۔

نیوزی لینڈ نے ہدف با آسانی ایک وکٹ کے نقصان پر 37ویں اوور میں حاصل کرکے ایونٹ کا فاتحانہ آغاز کیا۔

اگر آپ حالاتِ حاضرہ سے باخبر رہنا چاہتے ہیں تو ہمارے فیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے کو سبسکرائب کریں   اور بیل آئیکن پر کلک کریں