چیئرمین پی سی بی محسن نقوی پر امید ہیں کہ سب    مل کر چیمپئنز کپ کو کامیاب بنائیں گے۔

تفصیلات کے مطابق  پاکستانی کرکٹ کی تاریخ  کے پہلے چیمپئنز کپ ایونٹ کے آغاز سے قبل   چیئرمین پی سی بی محسن نقوی  نے فیصل آباد کا دورہ کیا۔

محسن نقوی  نے چیمپئنز کپ کی پانچوں ٹیموں کے مینٹورز مصباح الحق، شعیب ملک، وقار یونس، سرفراز احمد اور ثقلین مشتاق  سے ملاقات کی۔

ملاقات کے دوران چیمپئنز کپ کے انتظامات پر تفصیلی مشاورت کی گئی۔

مینٹورز نے چیمپئنز کپ کو ڈومیسٹک  کرکٹ کے لئے اہم ٹورنامنٹ قرار دیتے ہوئے اقبال اسٹیڈیم کی  پچز اور گراؤنڈ کی بہتری کیلئے تجاویز دیں۔

چیئرمین پی سی بی محسن نقوی  نے پچز اور گراؤنڈ کا معیار بہتر بنانے کی یقین دہانی کرواتے ہوئے کہا کہ کھلاڑیوں کو پریکٹس کے لئے یکساں مواقع دئیے جائیں گے۔

چیئرمین پی سی بی محسن نقوی نے موقع پر ہی ڈائریکٹر ڈومیسٹک کرکٹ اور ڈائریکٹر ہائی پرفارمنس کو ہدایات دیں کہ تمام ٹیموں کے کھلاڑیوں کو ورزش کے لئے بہترین جم کی سہولت فراہم کی جائیں۔

انہوں نے کہا کہ چیمپئنز کپ ٹورنامنٹ سے نئے کھلاڑی سامنے آئیں گے جنہیں پرفارمنس پر آگے آنے کا موقع دیں گے۔  اس سے قومی کرکٹ ٹیم کے لئے تینوں فارمیٹ کے لئے بیک اپ کھلاڑی تیار ہوں گے۔

چیئرمین پی سی بی نے کہا کہ چیمپئنز کپ کو پاکستان کا برانڈ بنانا ہے ،اس ضمن میں مینٹورز پر بہت ذمہ داری ہے۔   امید ہے کہ آپ سب مل کر چیمپئنز کپ ٹورنامنٹ کو کامیاب بنائیں گے۔

ایڈوائزر بلال افضل، پی سی بی کےڈائریکٹر ڈومیسٹک کرکٹ، ڈائریکٹر ہائی پرفارمنس، ڈائریکٹر انٹرنیشنل کرکٹ، ڈائریکٹر پی ایس ایل، سینئر جنرل مینجر ڈومیسٹک کرکٹ اور دیگر حکام بھی اس موقع پر موجود تھے۔

واضح رہے کہ  5 ٹیموں  کے درمیان کھیلے جانے والے چیمپئنز کپ  کے آغاز میں  صرف 3 روز باقی ہیں۔